Tags-Qismat

jāñ-ba-lab lamha-e-taskīñ mirī qismat hai 'shamīm'
be-ḳhudī phir mujhe dīvāna banātī kyuuñ hai

ham kis se shukr-o-mad.h qubūl-o-duā kareñ
lab qismat-e-shikāyat-e-tāsīr kar chuke

hai vahāñ nigah nigah ko sar-e-dil-barī magar
dil ko mere vo qismat-e-sad-tīr kar chuke

is gardish-e-qismat ne sar-gashta kiyā yaañ bhī
ai ḳhizr-e-rah-e-ulfat tum raah batā jaanā

mohabbat kī qismat meñ āvārgī hai
kahāñ tak koī us ke pīchhe paḌegā

qismat likhtī jaatī hai ham us ko paḌhte jaate haiñ
'arshad' ab to yādoñ hī meñ ghar ke phere hote haiñ

ghuTā aatā hai dam ye ishq ne ātish hai sulgā.ī
dil-e-sozāñ se yā qismat dhuāñ āñkhoñ kā duunā hai

Dūbnā 'aḳhtar' thā qismat meñ likhā
vaise ham tūfāñ se Takrā.e bahut

sochte rahne se kyā qismat kā likkhā jā.egā
jo bhī honā thā huā jo hogā dekhā jā.egā

ek koshish thī jo nākām rahī qismat se
'asr' kuchh kahiye use be-hunarī kyuuñ kahiye

jo tire dar se uThā phir vo kahīñ kā na rahā
us kī qismat meñ rahī dar-badrī kahte haiñ

sabza kī tarah mujh ko is gulshan-e-ālam meñ
apnoñ se bhī qismat ne begāna banā rakkhā

hai ajiib qismat-e-'kaif' bhī ye milā hai hāsil-e-bandagī
ki mazāq-e-sajda bhī kho diyā kisī sañg-e-dar kī talāsh meñ

ye kyā ki faqat ḳhaar hī qismat meñ likhe haiñ
ai ḳhāna-e-bar-andāz-e-chaman kuchh to idhar aur

apnī qismat se bhī nahīñ vāqif
jo sitāra-shanās hote haiñ

hamārī qismat kā pher dekho talāsh-e-manzil meñ umr guzrī
magar jahāñ se chale the kashfī vahīñ pe ham ḳhud ko pā rahe haiñ

jo sikhāyā apnī qismat ne vagarna us ko ġhair
kyā sikhā.egā sikhānā koī ham se siikh jaa.e

maut ho yā vo hoñ donoñ haiñ ilāj-e-dard-e-dil
vā-e-qismat ek bhī letā nahīñ aane kā naam

zor qismat pe chal nahīñ saktā
ḳhāmushī iḳhtiyār kartā huuñ

ham bhī qismat kā likhā dekheñge
'saif' chal nāma-e-dildār khule