Tags-Qismat

bādbānoñ se havā lag ke gale rotī hai
ye safīna bhī kisī mauj kī qismat hogā

jāgte jāgte pichhlī ka.ī rāteñ guzrī
chāñd honā mirī qismat meñ likhā hai shāyad

laakh shādāb ho ābād ho duniyā kā chaman
dil kī qismat meñ hai tanhā.ī ke kāñTe kī chubhan

merī qismat ke navishte ko miTā de koī
mujh ko qismat ke navishte ne miTā rakkhā hai

qatl kā mujrim rishvat de kar chhūT gayā
qismat dekho mere sar ilzām huā

ishq ko naġhma-e-ummīd sunā de aa kar
dil kī soī huī qismat ko jagā de aa kar

ġharībī amīrī hai qismat kā saudā
milo aadmī kī tarah aadmī se

kahāñ thī manzil-e-maqsūd apnī qismat meñ
kisī kī rāhguzar bhī milī hai mushkil se

chhupī jaatī hai manzil hī ġhubār-e-rāh-e-manzil meñ
mirī qismat sharīk-e-kārvāñ ma.alūm hotī hai

ham kareñge jo hamāre bas meñ hai
baaqī apnī apnī qismat hai yahāñ

soḳhta dil meñ na miltā tiir ko ḳhuuñ ai 'qamar'
ye bhī kuchh mehmāñ kī qismat se mayassar ho gayā

sunā.e kise apnī ġham kī kahānī kidhar jaa.e vo terī mahfil se uTh kar
nazar ne tirī jis kā dil le liyā ho vo qismat kā maarā kahāñ chain paa.e

ho un kā dīdār qismat se jab bhī adā ho ga.ī hai namāz-e-mohabbat
nikal aa.e jab bhī vo parde se bāhar nigāhoñ ne jhuk jhuk ke sajde sunā.e

dil-o-dimāġh meñ rishta nahīñ jahāñ koī
ik aise jism meñ jiinā hamārī qismat hai

jaise qismat kī lakīroñ pe hameñ chalnā hai
kaun samjhegā terī rāhguzar kyā kuchh hai

milī hai kāñToñ kī mujh ko qismat magar hai phūloñ kī merī fitrat
jahāñ huuñ pāmāl-e-ġham huuñ lekin jahāñ bhī huuñ muskurā rahā huuñ

qismat ik shab le ga.ī mujh ko jo bāġh-e-vasl meñ
dekhtā kyā huuñ ki us kā bāġhbāñ koī nahīñ

farishte ko mire naale yūñhī badnām karte haiñ
mire a.amāl likhtī haiñ mirī qismat kī tahrīreñ

ḳhat-e-qismat miTāte ho magar itnā samajh lenā
ye harf-e-ārzū hāthoñ kī rañgat le ke uTTheñge

us ke jalve se milī haiñ nazreñ
ab kahāñ par mirī qismat Thahre