Tags-Qismat

rindoñ kī bhī qismat kī ḳharābī kā hai afsos
mai ban ke parī shīsha-o-sāġhar se uḌī hai

hamāre darmiyāñ qurbat kahāñ thī
vo mil jaatā mirī qismat kahāñ thī

ḳhvāb aur ḳhvāhishoñ kī qismat hai
ḳhālī rastoñ pe rolne jaisī

husūl-e-maqsad meñ āḳhirash yuuñ rahegī qismat daḳhīl kab tak
tum apnī nākāmiyoñ pe doge muqaddaroñ kī dalīl kab tak

badlī un kī aadat kaisī
ulTī apnī qismat kaisī

nahīñ ye marhala ai dost har bismil kī qismat meñ
bahut mushkil se koī zaḳhm-e-dil nāsūr hotā hai

dīdār kī hasrat hī huī vaj.h-e-ta.assuf
qismat meñ mirī harf-e-mukarrar na huā thā

chāhā hai jis kā saaya shajar vo babūl hai
qismat meñ mere aaj bhī saḌkoñ kī dhuul hai

dil ne ishq kī nākāmī
qismat par de maarī hai

har kasī ko kab bhalā yuuñ mustarad kartā huuñ maiñ
tū hai ḳhush-qismat agar tujh se hasad kartā huuñ maiñ

tirā husn hai yagāna, tire saath hai zamāna
mire saath merī qismat kabhī thī na hai na hogī

karo 'mahmūd' qismat par qanā.at
jo mil jaa.e ba-āsānī bahut hai

qismat kā ban ga.ī hai sitāra tumhārī yaad
detī hai zindagī ko sahārā tumhārī yaad

hai zo.am chāk-e-girebāñ ko apnī qismat par
ki tum ne kyuuñ na majāl-e-rafū-garī baḳhshī

jāñ-ba-lab lamha-e-taskīñ mirī qismat hai 'shamīm'
be-ḳhudī phir mujhe dīvāna banātī kyuuñ hai

aao jo TuuTe hue ḳhvāb haiñ taqsīm kareñ
jis kī qismat meñ jo girdāb haiñ taqsīm kareñ

jab dil meñ tire ġham ne hasrat kī binā Daalī
duniyā mirī rāhat kī qismat ne miTā Daalī

siyah-kārī hī maiñ ne umr bhar kī tīra-baḳhtī se
tirā hāl-e-siyah kyā merī qismat kā sitāra hai

visāl-e-yār to qismat kī baat hai be-shak
ḳhayāl-e-yār bhī ham se bahut ḳhafā niklā

vo jo qismat kā ik sitāra thā
kah ke shab kī azaan TuuT gayā