Tags-Qismat

apnī qismat meñ TuuTe taare haiñ
māhtāb āftāb logoñ ke

gila shikva hasad kiina ke tohfe merī qismat haiñ
mire ahbāb ab is se ziyāda aur kyā deñge

kaheñ kyā ki kyā kyā sitam dekhte haiñ
likhā hai jo qismat meñ ham dekhte haiñ

qismat to dekh baar bhī apnā girā to vaañ
jis dasht-e-pur-ḳhatar meñ ka.ī kārvāñ rahe

kahīñ charāġhoñ ko niiñd aa.e kahīñ pe rabt-e-hijāb TuuTe
kisī kī āñkhoñ kī jaage qismat kisī kā band-e-naqāb TuuTe

na farq aayā 'habīb'-e-sābir-o-shākir kī rāhat meñ
banā duniyā meñ qismat kā likhā tahrīr patthar kī

is ko khel kaheñ qismat kā yā ham dariyā kī sāzish
tūfānoñ se bach nikle to aa ke kināre Duub ga.e

hājat se ziyāda kī talab sab ko hai 'tālib'
qismat se sivā phir bhī milā hai na milegā

vasl meñ hai apnī qismat kī ḳhalish bhī yādgār
dāman-e-shab se ulajh jaate haiñ aksar ḳhār-e-sub.h

lab o ruḳhsār kī qismat se duurī
rahegī zindagī kab tak adhūrī

reza reza honā un kī qismat hai
sū-e-falak jo be-bāl-o-par jaate haiñ

ab vahī log bigāḌī hai jinhoñ ne qismat
chāhte haiñ ki maiñ taqdīr banā bhī na sakūñ

terī qismat ho yā mirī 'jāmī'
jo bhī hai tere saath merī hai

khulī har-fard-o-har-millat kī qismat
ki āzādī kī sultānī ke din haiñ

apnī qismat ke nasheman ko jalā do sāġhar
chīḳhtā phirtā hai ye shola-e-tadbīr mirā

khulegā is tarah qismat kā band darvāza
jo kāvishoñ kī agar chābiyāñ banāte haiñ

ḳhudā asar se bachā.e is āstāne ko
duā chalī hai mirī qismat āzmāne ko

zulm kī qismat-e-nākāra-o-rusvā se kaho
jabr kī hikmat-e-parkār ke iimā se kaho

kisī doshīza kī zulfeñ ye nahīñ qismat hai
vaqt lagtā hai bahut us ko sañvarne ke liye

sāhiloñ par kyā gharoñdoñ kā vajūd
TūTnā hī in kī qismat ho ga.ī