Tags-Raat

raat kī raakh muñh pe mal mal kar
sub.h kitnī sañvar ga.ī dekho

sub.h kī fikr ba.ad meñ karnā
raat kitnī guzar ga.ī dekho

har raat duā karūñ sahar kī
har sub.h nayā fareb khā.ūñ

din nikalte hī chalā aa.egā vo paas mire
raat se milne gayā hai abhī saaya merā

ab talak hairān huuñ maiñ raat ke us ḳhvāb se
ḳhuun kī barsāt hai ghar tar-ba-tar merā bhī hai

laboñ se lagte hī ho ga.ī thī tamām sardī dil-o-jigar meñ
diyā thā saaqī ne raat ham ko kuchh aise mai kā ayāġh ThanDā

din safar kar chukā ab raat kī baarī hai 'shakīl'
niind aane ko hai darvāza lagā chāhtā hai

saath mere raat bhar jo jāgtī āvāz hai
kaun jaane ye to merī ruuh kī āvāz hai

vo bigaḌnā vasl kī raat kā vo na mānñā kisī baat kā
vo nahīñ nahīñ kī har aan adā tumheñ yaad ho ki na yaad ho

añdherī raat meñ ai jān-e-jāñ bhaTke musāfir ko
diye kī lau bhī jaise ik qamar ma.alūm hotī hai

tavāf karne jo aayā thā raat chupke se
gumān kahtā hai tishna sadā kā jhoñkā thā

hunūz raat hai jalnā paḌegā us ko bhī
ki mere saath pighalnā paḌegā us ko bhī

sūraj ko bujhā dete ho tum shaam se pahle
aur dil se ye kahte ho ki din-rāt jalā kar

ahd-e-javānī ro ro kaaTā piirī meñ liiñ āñkheñ muuñd
yaanī raat bahut the jaage sub.h huī ārām kiyā

chāñd niklā to ġhazab Dhā jā.egā
raat behtar hai ye kaalī hī rahe

añdherī raat meñ āñkhoñ meñ ḳhvāb kī sūrat
kabhī kabhī nazar aa.ī udaas tanhā.ī

maiñ ne kahā ki dekh ye maiñ ye havā ye raat
us ne kahā ki merī paḌhā.ī kā vaqt hai

hamāre gird vahī āhanī salāḳheñ haiñ
siyāh raat kā kaTnā to ek dhokā thā

añdherī raat meñ ye kis kā naqsh-e-pā chamkā
musāfiroñ kī nigāhoñ meñ rāsta chamkā

ho mubārak tujhe āñkhoñ meñ samānā din-rāt
zeb-e-bāzū rahe har-vaqt nazar kā ta.avīz