Tags-Raat

faroġh-e-jalva-e-ummīd terī umr darāz
siyāh raat hai sar par sahar nigāh meñ hai

raat kī kokh se
sub.h kī ek nannhī kiran ne janam yuuñ liyā

nañgī saḌkoñ par bhaTak kar dekh jab martī hai raat
reñgtā hai har taraf vīrāna tere shahr meñ

dil chiir kar dikhāne kī shai ho to maiñ dikhā.ūñ
furqat kī raat sadma mirī jaañ ko kyā huā

bāġh-e-jāñ se tū kabhī raat ga.e guzrā hai
kahte haiñ raat meñ kheleñ haiñ parī-zād us meñ

sūraj rahā jo din meñ mire ghar se duur duur
phir maiñ ne raat meñ bhī ujālā nahīñ kiyā

raat kyā so.e ki baaqī umr kī niiñd uḌ ga.ī
ḳhvāb kyā dekhā ki dhaḌkā lag gayā tābīr kā

ishq udāsī ke paiġhām to laatā rahtā hai din raat
lekin ham ko ḳhush rahne kī aadat bahut ziyāda hai

raat ke ba.ad vo sub.h kahāñ hai din ke ba.ad vo shaam kahāñ
jo āshufta-sarī hai muqaddar us meñ qaid-e-maqām kahāñ

bhīgī raat hai suunī ghaḌiyāñ ab vo jalva-e-ām tamām
bandhan toḌ ke jā.ūñ lekin ai dil ai nākām kahāñ

raat mere fuġhāñ-o-nāle se
saarī bastī na niiñd bhar soī

partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām

hijr kī raat nahīñ Dhalne kī
ab charāġhoñ ko ijāzat diije

haath meñ mish.al liye har samt pahre par raho
raat kī chādar lapeTe hamla-āvar aa.egā

sunā de phir koī jhūTī kahānī
maiñ pichhlī raat kā jaagā huā huuñ

aaj to sham.a havāoñ se ye kahtī hai 'salām'
raat bhārī hai maiñ bīmār ko kaise chhoḌūñ

din ko itne kaam kis tarah karegā kaun
raat bhar to jāgte rahā kareñge ham

añdherī raat kī parchhā.iyoñ meñ Duub gayā
sahar kī khoj meñ jo bhī ufuq ke paar gayā

muzmahil thā koī bahut kal raat
phir tilismāt kā fusūñ Thahrā

un rāstoñ meñ raat bhaTaktī hai be-sabab
aisā bhī ḳhauf kyā hai jo ghar hī na jā.iye