Tags-Raat

kabhī yuuñ bhī aa mirī aañkh meñ ki mirī nazar ko ḳhabar na ho
mujhe ek raat navāz de magar is ke ba.ad sahar na ho

ye ġhazal ki jaise hiran kī aañkh meñ pichhlī raat kī chāñdnī
na bujhe ḳharābe kī raushnī kabhī be-charāġh ye ghar na ho

kaaTā din to taḌap taḌap kar
aafat kī raat sar par aa.ī

kaun thā vo ḳhvāb ke malbūs meñ lipTā huā
raat ke gumbad se Takrā kar palaT aa.ī sadā

jin ko rakhtī thī mo.attar terī yādoñ kī shamīm
teġh kī jhankār meñ gum vo hasīñ din-rāt haiñ

so jā.iye huzūr ki ab raat ho ga.ī
jo baat hone vaalī thī vo baat ho ga.ī

dhuup kī aañch hai jo raat ga.e
chāñdnī ban ke muskurātī hai

raat us kī chashm-e-maigūñ ḳhvāb meñ dekhī thī maiñ
sub.h sote se uThā to sāmne paimāna thā

kuchh bhī nahīñ kahīñ nahīñ ḳhvāb ke iḳhtiyār meñ
raat guzār dī ga.ī sub.h ke intizār meñ

apnī ġharaz ko aa.e the vo raat 'mus.hafī'
le kar mirī baġhal se mirā dil ravāñ hue

ye kis ke chāh-e-zanaḳhdāñ kī fikr meñ Duubā
tamām raat jo zaanū se sar judā na rahā

jo saarā din mire ḳhvāboñ ko reza reza karte haiñ
maiñ un lamhoñ ko sī kar raat kā bistar banātī huuñ

maiñ raat kā bhed to kholūñgā jab niiñd na mujh ko aa.egī
kyuuñ chāñd sitāre aate haiñ har raat mujhe samjhāne ko

tirī judā.ī meñ raat saarī sabā ye kahnā ba-āh-o-zārī
badalte guzrī hai mujh ko karvaT kabhī idhar ko kabhī udhar ko

aas ke raushan diye rakh kar fasīl-e-shām par
raat ke andhe safar ko be-ḳhatar us ne kiyā

nigāh raat kā ziina talāsh kartī rahī
sulagte ḳhvāb kisī taaq par rakhe hue the

chāndnī chāndnī nahīñ 'aḳhtar'
raat kī god meñ saverā hai

raat din rahtī hai gardish un ko
chāñd sūraj qadah-e-mul Thahre

raat kī rañgīniyāñ muñh dekhtī rah jā.eñgī
ham thakan se chuur nañge farsh par so jā.eñge

ḳhud apne aap se larzāñ rahī ulajhtī rahī
uThā na bār-e-garāñ raat kī javānī se