Tags-Raat

tujh ko paane ke junūñ meñ ham vahāñ tak aa ga.e
ḳhud ko ab khone kā Dar hai raat hai tanhā.ī hai

sab munajjam kahte haiñ ab hai barābar raat din
sar se pā tak dekh kar zulf-e-darāz-e-yār ko

bhare haiñ raat ke reze kuchh aise āñkhoñ meñ
ujālā ho to ham āñkheñ jhapakte rahte haiñ

dil kī betābī nahīñ Thaharne detī hai mujhe
din kahīñ raat kahīñ sub.h kahīñ shaam kahīñ

aaj kī raat bahut bhārī hai donoñ par
aaj mujhe vo ḳhat lauTāne aa.ī hai

hai ye ajab tarah kī baat kyūñki na maliye apne haath
dil pe hamāre vo to raat chaukī sī ik biThā ga.e

va.ada-e-vasl-e-sub.h us se karo
kaT sake jis se raat furqat kī

din lage haiñ ye raat ko merī
chashm-e-āhū charāġh-e-sahrā hai

maiñ kahāñ raat kā musāfir thā
chāñd ḳhud aa ke bas gayā mujh meñ

kis taraf le jā.egī so.e hue logoñ ko raat
Dar rahā huuñ us kī āñkhoñ meñ girānī dekh kar

tirī nazar ke ishāre na raushnī ban jaa.eñ
to phir ye raat kahāñ jugnuoñ ko sone de

abhī shaam zarā sī mahkī hai par kyā kahiye kyā jaldī hai
abhī raat paḌāv bhī aage hai aur ḳhvāb bulāve aane lage

chāñd kyoñ jāgtā hai saath mire
raat ke baj rahe haiñ paune do

raat aa.ī hai balāoñ se rihā.ī degī
ab na dīvār na zanjīr dikhā.ī degī

din nahīñ raat nahīñ sub.h nahīñ shaam nahīñ
rah ga.ī ek nahīñ haañ kā kahīñ naam nahīñ

hairat-e-husn ne majbūr kiyā hai 'hasrat'
vasl-e-jānāñ kī yūñhī raat chalī jaatī hai

sub.h hotī hai raat aane ko
raat ko intizār rahtā hai

barsoñ ke jaise lamhoñ meñ ye raat guzartī jā.egī
tum sāmne aa.e gar dil kī dhaḌkan bhī Thahar hī jā.egī

khaḌī hai raat añdheroñ kā azhdahām lagā.e
aur ek raushnī baiThī hai apnā kaam lagā.e

raat chup-chāp dabe paañv chale jaatī hai
raat ḳhāmosh hai rotī nahīñ hañstī bhī nahīñ