Tags-Raat

ruḳh-e-raushan pe fidā aur na siyah-zulf kā ḳhabt
na koī din hai mujhe aur na koī raat mujhe

mauja-e-ḳhūñ kisī siine meñ rukā thā kal raat
dard uThtā rahā chubhtā rahā dukhtā rahā dil

Dhaltī raat intizār ik parchhā.īñ
sabza bañgla siyah gulāb kī baaḌ

mauj-e-dariyā thī kahīñ aur na havā kā jhoñkā
ret par likkhī thī jo raat ibārat na milī

aañkh hañsī
phir kaalī kaloTī raat hañsī

thī barf sī raat aur lashkar
be-ḳhemā o be-ridā paḌā thā

vo charāġhāñ o chāñdnī kī raat
sair-e-hat-phūl o phuljhaḌī hai yaad

koī charāġh jahāñ raushnī kā zikr kare
siyāh raat kā chehra vahīñ utar jaa.e

hijr kī raat meñ jab dard ke bistar pe girā
shab ke bahte hue dhāre ne kahā bismillāh

ai husn tujhe itnā kyuuñ nāz-e-javānī hai
ye gul-badanī terī ik raat kī raanī hai

pareshāñ raat meñ dil hai charāġh-e-ās kī mānind
shab-e-vāda na aa.e vo to raushan sī sahar kyuuñ ho

musalsal raat din chalnā hai rāh-e-ishq meñ tanhā
kisī ke vāste ye raah āḳhir muḳhtasar kyuuñ ho

ab to khul jaanī chāhiye āñkheñ
raat ko din pukārnā kab tak

raat be-parda sī lagtī hai mujhe
ḳhauf ne aisī nazar dī hai mujhe

har raushnī kī buuñd pe lab rakh chukī hai raat
baḌhne lage zamīñ kī taraf tīrgī ke haat

asrār-e-zamāna ban ban kar aate haiñ yahāñ din raat magar
fitrat ke masā.ib se ab tak haarā hai kahāñ ye insāñ bhī

maiñ huuñ merī chashm-e-tar hai raat hai tanhā.ī hai
dard merā ham-safar hai raat hai tanhā.ī hai

jugnuoñ se saath chalne kī guzārish kījiye
hijr kā lambā safar hai raat hai tanhā.ī hai

phir vahī yādeñ vahī aañsū vahī āh-o-fuġhāñ
phir vahī dīvār-o-dar hai raat hai tanhā.ī hai

dostoñ kī bhiiḌ ko masrūfiyat meñ kho diyā
aaj fursat baam par hai raat hai tanhā.ī hai