Tags-Raat

da.avā kisī kā din ke ujāloñ pe ab nahīñ
jo kuchh bhī thā vo raat ga.e de diyā gayā

shaam bhī hai sub.h bhī hai aur din bhī raat bhī
māh-e-tābāñ ab bhī hai mahr-e-daraḳhshāñ ab bhī hai

maiñ sub.h ḳhvāb se jaagā to ye ḳhayāl aayā
jo raat mere barābar thā kyā huā us kā

raat se shikāyat kyā bas tumhīñ se kahnā hai
tum zarā Thahar jaao raat kab Thahartī hai

vo raat niind kī dahlīz par tamām huī
abhī to ḳhvāb pe ik aur ḳhvāb dharnā thā

raat puurī khaḌī hai abhī sahn meñ
taare mujh ko abhī se jagāne lage

vasl kī baat aur hī kuchh thī
un dinoñ raat aur hī kuchh thī

aap aa.e the zindagī merī
raat kī raat aur hī kuchh thī

har raat niim ġhunūdgī meñ
mere kānoñ meñ

āsmānoñ se zamīnoñ pe javāb aa.egā
ek din raat Dhale yaum-e-hisāb aa.egā

kab mirī āñkhoñ meñ ḳhūñ-rañg kiran utregī
raat kī shāḳh pe kab aks-e-gulāb aa.egā

kabhī hañste nahīñ kabhī rote nahīñ kabhī koī gunāh nahīñ karte
hameñ sub.h kahāñ se mile ki kabhī koī raat siyāh nahīñ karte

aa.egī ham ko raas na yak-rañgi-e-ḳhalā
ahl-e-zamīñ haiñ ham hameñ din raat chāhiye

kuchh ġham firāq kā hai na kuchh vasl kī ḳhushī
huuñ us ke zauq-o-shauq meñ masrūr raat din

soch din raat yahī hai tire dīvāne kī
jā.iye shahr ko par chhoḌiye sahrā kyūñkar

shāyad mirī nigāh meñ koī shigāf thā
varna udaas raat kā chehrā to saaf thā

raat hissa hai mirī umr kā jī lene de
zindagī chhoḌ ke tanhā mujhe jaatī kyuuñ hai

hoñToñ meñ jam rahī hai tire aaj kyuuñ dharī
bhejī thiiñ kis ne raat ko pānoñ kī Dholiyāñ

ab to maġhrib kī fanā-gāh meñ vo sog nahīñ
aks tahrīr hai ik raat kā halkā halkā

āñkhoñ se merī sub.h tak aañsū na tham sake
kal raat vo milā to bahut hī udaas thā