Tags-Raat

TuuT jā.egā ye terā bhī takabbur sūraj
raat jab aa.egī tārīk havāle le kar

vo so.e ho ke be-parda yahāñ kis kis tamannā se
magar sadqe havā ke raat bhar ro.e daraḳhshāñ par

raat karte haiñ sitāre kaise
raat bhar niiñd na aane se khulā

raat kī uḌtī huī raakh se bojhal hai nasīm
yuuñ asā Tek ke chaltī hai ki rahm aatā hai

gar aaj tujh se judā haiñ to kal baham hoñge
ye raat bhar kī judā.ī to koī baat nahīñ

mānind-e-salīb is ko liye phirtā huuñ din raat
kāñdhoñ pe uThā.e ye vabāl apnī ye duniyā

kaaT rahā huuñ ik ik din āzār ke saath
jaise raat guzartī hai bīmār ke saath

jo raat basar kī thī mire hijr meñ tū ne
us raat bahut der tire saath rahā maiñ

raat phir jānib-e-sahar aa.ī
kitnī dushvār rahguzar aa.ī

jo niil gagan se aa.ī ho
to raushan merī raat karo

din raat tumhārī yādoñ se ham zaḳhm sañvārā karte haiñ
pardes meñ jaise-taise hī ai dost guzārā karte haiñ

raat Dhal jā.egī mai-ḳhāna sambhal jā.egā
koī naġhma koī paiġhām sunāo yaaro

gar yuuñ hī baḌhtā rahā din raat shuġhl-e-mai-kashī
ek din is mai-kade ke piir ban jā.eñge ham

aisā lagtā hai ki tāroñ se damaktī huī raat
ik zarā jumbish-e-mizhgāñ se bhī bujh jā.egī

raat kī jādūgarī ḳhvāb sī ban jā.egī
sham.a-dānoñ meñ faqat raakh hī rah jā.egī

ik raat bhī ai maah na jaagī mirī qismat
suntā thā bahut shor duā-e-saharī kā

raat tārīk rāste ḳhāmosh
manziloñ tak haiñ qumqume ḳhāmosh

suno ye ġham kī siyah raat jaane vaalī hai
abhī azaan kī āvāz aane vaalī hai

arsa-e-zulmat-e-hayāt kaTe
ham-nafas muskurā ki raat kaTe

aflāk kī gardish se dam-bhar duniyā meñ hameñ ārām nahīñ
vo din nahīñ vo ab raat nahīñ vo sub.h nahīñ vo shaam nahīñ