Tags-Raat

us ne ḳhat meñ bheje haiñ
bhīgī raat aur bhīgā din

dil jalāne se kahāñ duur añdherā hogā
raat ye vo hai ki mushkil se saverā hogā

vo ek raat thī aisī ki qadr-o-asrā ne
nigāh apnī jamā.ī to phir haTā.ī nahīñ

tamām raat mirī niiñd mujh ko Dastī rahī
tamām ḳhvāb mirī dekh-bhāl karte rahe

haa.e mat pūchho marīz-e-ġham kī kaifīyāt-e-karb
niiñd kyā ġhaflat sī ho jaatī hī pichhlī raat ko

merī aahoñ meñ ba-qaul un ke agar tāqat nahīñ
charḳh se phir kyuuñ sitāre TūTte haiñ raat ko

chāñdnī ho yā añdherī mujh ko 'tālib' vāsta
maiñ to aafat hī samajhtā huuñ hamesha raat ko

ham sāñjh samay kī chhāyā haiñ tum chaḌhtī raat ke chandramāñ
ham jaate haiñ tum aate ho phir mel kī sūrat kyūñkar ho

ab 'inshā'-jī ko bulānā kyā ab pyaar ke diip jalānā kyā
jab dhuup aur chhāyā ek se hoñ jab din aur raat barābar ho

mirī aañkh terī talāsh meñ yuuñ bhaTaktī rahtī hai rāt-din
jaise jañgaloñ meñ hiran koī ho shikāriyoñ meñ ghirā huā

hijr kī raat yaad aatī hai
phir vahī baat yaad aatī hai

tum the aur ham the chāñd niklā thā
haa.e vo raat yaad aatī hai

haa.e kyā chiiz thī javānī bhī
ab to din-rāt yaad aatī hai

duur terī mahfil se raat din sulagtā huuñ
tū mirī tamannā hai maiñ tirā tamāshā huuñ

ye kaisī mutriba hai jo chhup kar jahān se
dhīme suroñ meñ raat ko gaatī hai aaj bhī

sab gharoñ meñ to charāġhoñ kā ujālā hogā
lekin afsurda faqat raat kā chehrā hogā

mujhī se aa.ī thī milne udaas chāñdnī raat
agar ye jāntā hotā to jāgtā bhī maiñ

yuuñ to har raat hī rahtī hai ajab bechainī
aaj kuchh dard mire dil meñ sivā hotā hai

raat se ek soch meñ gum huuñ
kis bahāne tujhe kahūñ aa jā

gaañv ke parind tum ko kyā patā bidesoñ meñ
raat ham akeloñ kī kis tarah guzartī hai