Tags-Raat

seb chahkār jañgalī chiḌiyāñ
raat vaadī meñ chāñd jhīloñ par

jā jā ke palaT aate haiñ kis ke liye mausam
ye shaam shafaq raat sahar kis ke liye hai

ġhazab kiyā tire va.ade pe e'tibār kiyā
tamām raat qayāmat kā intizār kiyā

ḳhizāñ kī vo sard raat bhī maiñ ne ghar se bāhar guzār dī thī
ki mere bistar pe laash ban kar mirā hī saaya paḌā huā thā

ye aur baat qafas meñ guzār duuñ din-rāt
mirā maqām to varna ye gulistāñ bhī nahīñ

raat bhar ḳhauf se chaTḳhe the sahar kī ḳhātir
sub.h-dam ḳhud ko bikharte hue dar par dekhā

hijr kī raat meñ sham-e-shabistāñ had se baḌh kar raushan thī
is hañgām meñ dil bhī jalā ho aisā bhī ho saktā hai

añdherī raat ke ai chāñd tū batā mujh ko
mirī tarah vo kabhī tere saath jaagā hai

ye kyā tilism hai kyuuñ raat bhar sisaktā huuñ
vo kaun hai jo diyoñ meñ jalā rahā hai mujhe

raat majlis meñ tire husn ke sho.ale ke huzūr
sham.a ke muñh pe jo dekhā to kahīñ nuur na thā

sūraj mirā paḌā hai āñkhoñ ke rāste meñ
din Dhal chukā hai kab kā raat aa nahīñ rahī hai

jis raat farhat-ehsās apnī hadoñ se nikle
vo maañ kī kokh jaisī raat aa nahīñ rahī hai

ham zinda haiñ ai firāq kī raat
pyārī tire baal kyuuñ khule haiñ

dasht-e-ġham aur har shajar tanhā
raat soī hai be-ḳhabar tanhā

kaTtā nahīñ hai sard-o-siyah-rāt kā pahāḌ
sūraj thā saḳht dhuup thī din phir bhī kaT gayā

chashm o ruḳhsār ke azkār ko jaarī rakkho
pyaar ke naame ko doharāo ki kuchh raat kaTe

kaun aayā rāste ā.īna-ḳhāne ho ga.e
raat raushan ho ga.ī din bhī suhāne ho ga.e

faqat ek dhun thī ki rāt-din isī ḳhvāb-zār meñ gum raheñ
vo surūr aisā surūr thā vo ḳhumār aisā ḳhumār thā

añdherī raat hai rasta sujhā.ī de to chaleñ
sar-e-falak koī taara dikhā.ī de to chaleñ

ghulī jo raat kī ḳhushbū to sāzishī jaage
dahaktī āñkhoñ ne ghere meñ le liyā mujh ko