Tags-Raaz

raaz kī baat to koī bhī nahīñ
arz-e-hālāt se Dar lagtā hai

ayaañ kiyā hai tirā raaz fī-sabīlillāh
ḳhabar na thī ki hai ye bhī ḳhabar barā.e-faroḳht

ye raaz ham ne 'āsim' 'ḳhādim'-safī' se paayā
gar rushd haiñ to ham haiñ irshād haiñ to ham haiñ

apne ehsās se bāhar nahīñ hone detā
raaz zāhir bhī ye mujh par nahīñ hone detā

vo mere sāmne the maiñ thā un ke sāmne
jab tak ki merā raaz kisī par ayaañ na thā

badnām ḳhud hue ho zabāñ se nikāl kar
merā sivā tumhāre koī rāz-dāñ na thā

suntā ye kaun zabt pe qaabū nahīñ hai ab
achchhā huā jo koī mirā rāz-dāñ na thā

mirī vahshatoñ ne jis ko na banā ke raaz rakkhā
vahī raaz hai ki ab tak hai miyān-e-rāz-dārāñ

phir vahī kārobār-e-rāz-o-niyāz
phir vahī shauq-e-ḳhalvat-ārā.ī

vo ḳharāsh-e-dil jo ai jazba-e-jazbī mirī hamrāz thī
aaj use bhī zaḳhm ban kar muskurānā aa gayā

ishq shabnam nahīñ sharārā hai
raaz ye mujh pe āshkārā hai

rāz-e-ulfat ke ham nahīñ mujrim
aap ke rāz-dāñ bahut se haiñ

ba-faiz-e-josh-e-junūñ ab maiñ us maqām pe huuñ
jahāñ junūñ hī mirā rāz-dār rahtā hai

abhī hai iḳhtilāf-e-jām-o-mīnā raaz kī had tak
na-jāne kyā ho gar pīr-o-muġhāñ tak baat jā pahuñchī

aa.ine TuuT ga.e aks kī sachchā.ī par
aur sachchā.ī hamesha kī tarah raaz rahī

dard ḳhāmosh rahā TūTtī āvāz rahī
merī har shaam tirī yaad kī hamrāz rahī

vo hāzir ho ki ġhā.eb ho nihāñ yuuñ bhī hai aur yuuñ bhī
sarāsar raaz rāz-e-kun-fakāñ yuuñ bhī hai aur yuuñ bhī

vaqt kī mehrāb meñ ik sham-e-nau raushan kareñ
rāzdān-e-ārzū ham vāris-e-āfāt haiñ

ram kā hirnoñ ke bagūle kī bhī betābī kā
raaz sab vaaz kiyā phaaḌ garebāñ mujh se

dostī kā raaz ifshā kar ga.ī
dushmanī bhī ik baḌā kirdār hai