Tags-Raaz

vaañ sarguzisht-e-dushman vo kah rahe haiñ muñh par
yaañ be-ḳhudī hai is par kyā rāz-dār haiñ ham

kyā jaane kyā dikhā.e kam-baḳht rāz-e-dushman
be-iḳhtiyār ho tum aur be-qarār haiñ ham

hal kar liyā majāz haqīqat ke raaz ko
paa.ī hai maiñ ne ḳhvāb kī ta.abīr ḳhvāb meñ

tum ko hazār sharm sahī mujh ko laakh zabt
ulfat vo raaz hai ki chhupāyā na jā.egā

raaz jis ko batā diyā dil kā
vo hī merā raqīb hotā hai

rāz-e-hastī to kyā khul sakegā kabhī
mil ga.e the magar kuchh kinā.e hameñ

bahut dānā-e-rāz aa.e hazāroñ nukta-dāñ aa.e
samajhne ke liye vo zindagī ko ġham samajhte haiñ

is raaz se vāqif nahīñ 'afzal' ye zamāna
ashkoñ ke samundar meñ jazīra hai ġhazal kā

mujh meñ himmat hai ki maiñ raaz ko ifshā na karūñ
ye mirā zarf hai ye sheva-e-mansūr nahīñ

hai husūl-e-ārzū kā raaz tark-e-ārzū
maiñ ne duniyā chhoḌ dī to mil ga.ī duniyā mujhe

jo raaz ittifāqan muñh se nikal gayā thā
vo raaz ehtiyātan afsāna kar diyā hai

chashm-e-nargis jā-e-shabnam ḳhuun ro.egī nadīm
maiñ ne jis din gulsitāñ kā raaz ifshā kar diyā

mohabbat kis se ham karte haiñ kuchh batlā nahīñ sakte
ye hai vo raaz jis meñ dil ko bhī mahram nahīñ karte

garche hai tarz-e-taġhāful parda-dār-e-rāz-e-ishq
par ham aise kho.e jaate haiñ ki vo pā jaa.e hai

dil se kisī kī āñkhoñ tak kuchh raaz kī bāteñ pahuñchī haiñ
aañkh se dil tak aayā ho aisā to koī paiġhām nahīñ

nihāñ abhī mirī vahshat kā raaz rahne de
na chheḌ qissa-e-zulf-e-darāz rahne de

bastiyāñ raaz kī ashkoñ meñ bahī jaatī haiñ
maujzan ġham kā samundar kabhī aisā to na thā

ye ishq hadd-e-ġham se guzar kar bhī raaz hai
is kashmakash meñ ham sā koī mubtilā na ho

khulā hai umr kī shām-e-hazīñ meñ raaz ye 'pāshī'
ki har dam maut ko bhī saath rakhtī hai hayāt apne

na hogī dilkashī duniyā meñ ik din vo bhī aa.egā
ki saare raaz ugal degī kisī din kā.enāt apne