Tags-Raaz

jādūgarī ke raaz se nā-āshnā na the
ham to tire ḳhayāl se majbūr ho ga.e

vo ek sher jo maiñ ne kahā nahīñ ab tak
vo ek raaz jise maiñ chhupā nahīñ saktā

ilm allāh ne farz ham par kiyā
ilm se ham pe rāz-e-haqīqat khulā

chaman meñ sirf hamīñ rāzdāñ haiñ kāñToñ ke
guloñ ke saath basar ham ne zindagī kī hai

na ho rashk to kījiye vahāñ mad.h-e-dushman
ki hai yaar kī rāz-dānī kī sūrat

us yār-e-shoḳh-chashm se 'ḳhālid' kā irtibāt
ik raaz thā ki jis ko chhupāne nahīñ diyā

magar ye raaz faqat titliyāñ samajhtī haiñ
chamakte rañg bhī jiinā muhāl karte haiñ

ushshāq agar hai mahram-e-rāz
dilbar kuuñ hijāb ḳhuub hai ḳhuub

ye jhilmilātā sā jahāñ gaahe ayaañ gaahe nihāñ
Thahre to kuchh ma.alūm ho dekhūñ to raaz ifshā karūñ

kahīñ kalī ne tabassum kā raaz samjhā hai
jo ḳhud chaman hai vo apnī bahār kyā jaane

raaz na pūchho mustaqbil kā sher-o-suḳhan kī is mahfil kā
sāhab-e-fan zulmat meñ paḌe haiñ duur charāġh-e-fan jaltā hai

hameñ ma.alūm hai 'tālib' haqīqat rāz-e-hastī kī
magar is be-haqīqat kī haqīqat hī ayaañ kyuuñ ho

kisī se mudda.ā-e-dil kahā ho to zabāñ kaT jaa.e
bas ik tū hai jo dil ke raaz kā mahram hai barsoñ se

tum ne ik dāstāñ banā Daalī
ham ne to rāz-e-ġham kahā hī nahīñ

āñkhoñ se apnī 'āsif' tū ehtirāz karnā
ye ḳhū burī hai in kā ifshā-e-rāz karnā

tire ahl-e-dīd ko dekh ke kabhī khul sakā hai ye raaz bhī
unheñ jis ne ahl-e-nazar kiyā vo tirā ḳharāb-e-nazar bhī hai

jo bas ek pahlī nigāh meñ mire dil kā raaz samajh sake
mujhe ibtidā-e-hayāt se isī dīda-var kī talāsh hai

ajiib rāh-e-adam hai par ḳhatm har ek raahī ko hai yahī ġham
ye raaz khultā nahīñ kisī par jahāñ meñ azm-e-safar se pahle

tārāj-e-kāvish-e-ġham-e-hijrāñ huā 'asad'
siina ki thā dafīna gohar-hā-e-rāz kā

mahram nahīñ hai tū hī navā-hā-e-rāz kā
yaañ varna jo hijāb hai parda hai saaz kā