Tags-Raaz

tū merā raaz bhī kaise chhupā gayā mujh se
tirā javāb nahīñ rāzdār hone meñ

maiñ ne kī hadd-e-nazar paar to ye raaz khulā
āsmāñ the to faqat mere ḳhayālāt meñ the

ye raaz apnī mast nigāhoñ se pūchh lo
kyuuñ dil rahīn-e-minnat-e-sāġhar nahīñ huā

un kī tasvīr se har lamha rahe rāz-o-niyāz
muntashir shān-e-ḳhayālāt na hone paa.e

batā.e detī hai be-pūchhe raaz sab dil ke
nigāh-e-shauq kisī kī nigāh se mil ke

tū apne va.az pe vaa.iz na bhuul sach hī nahīñ
ki rāz-e-ishq se tere ta.iiñ ḳhabar vaa.iz

maiñ nahīñ maslak-e-arbāb-e-vafā se vāqif
husn kyuuñ raaz kī har baat batātā hai mujhe

nigāh-e-qahr-parvar ko bhī tamhīd-e-ḳhushī samjhe
samajhnā hai to koī ham se rāz-e-zindagī samjhe

jaañ nisāroñ par tumhāre raaz ye ifshā huā
maut lutf-e-sarmadī hai ziist yaksar iztirāb

mahfil meñ un kī sham.a jalī hai ki jān-o-dil
khultā hai kab ye rāz-e-nihāñ dekhte raho

jo sirr-e-ishq bhī hai rāz-e-husn-e-jānāñ bhī
yaqīñ karo mire dil meñ ik aisī baat bhī hai

is rāz-e-ishq ko kahīñ ro ro ke sham.a saañ
iz.hār kījiyo na 'jahāñdār' dekhnā

raaz aaj mire dam se huā rāz-e-mohabbat
kuchh raaz na thā jab koī mahram na huā thā

kuchh ġhubār āñkhoñ tak aayā raaz ham par tab khulā
qāfila ab bhī koī is dil kī vīrānī meñ hai

ziyārat-gāh-e-ahl-e-azm-o-himmat hai lahad merī
ki ḳhāk-e-rāh ko maiñ ne batāyā rāz-e-alvandī

be-zabānī zabāñ na ho jaa.e
rāz-e-ulfat ayaañ na ho jaa.e

munhasir ashk kī do buuñd pe thā jis kā bharam
mujh ko ai 'qādrī' us raaz pe ronā aayā

rāz-dār-e-gul-o-nasrīñ to hazāroñ the magar
koī samjhā hī nahīñ barg-e-pareshāñ kī zabāñ

pahle zarrāt-e-zamīñ-bos kā hamrāz to ban
phir samajhnā bahut āsāñ hai sitāroñ kī zabāñ

ab har ghar kī chaukhaT ham par hañstī hai to raaz khulā
phuuT phuuT kar roī thiiñ kyuuñ dahlīzeñ chalte vaqt bahut