Tags-Raaz

ye rāz-e-dair-o-haram hai kisī ko kyā ma.alūm
kahāniyoñ ko ilāqa hai vāqi.āt se kyā

ham-safar kaun huā lāla-e-sahrā.ī kā
parda-e-rāz-e-azal chaak kiye jaatā hai

tilism-e-rāz na khul jaa.e tañg-bīnoñ par
tumhāre naam se pahle hazār naam liye

ḳhud ham ne faash faash kiyā rāz-e-āshiqī
dāman ko taar taar kiyā haa.e kyā kiyā

merā har sher hai ik rāz-e-haqīqat 'beḳhud'
maiñ huuñ urdu kā 'nazīrī' mujhe tū kyā samjhā

hamdam nahīñ rafīq nahīñ ham-navā nahīñ
lekin hamārā sab se baḌā rāzdāñ hai vaqt

idhar aa āshnā-e-rāz-e-fitrat
sadā aatī hai dasht-e-be-karāñ se

mahram-e-rāz-e-haram huuñ vāqif-e-but-ḳhāna huuñ
maiñ rah-o-rasm-e-mohabbat kā magar dīvāna huuñ

bikhar gayā to mujhe koī ġham nahīñ is kā
ki raaz mujh pe ka.ī vā hue bikharte hue

jo na kahnā thā kahā sab kuchh 'nizām'
raaz bātoñ meñ vo aisā khul gayā

dekhiye kyā dil se dil ko raah hai
raaz jo tum ne chhupāyā khul gayā

dil kī be-tābī ne rusvā kar diyā
haa.e sab par raaz apnā khul gayā

ijz-e-gunāh ke dam tak haiñ ismat-e-kāmil ke jalve
pastī hai to bulandī hai rāz-e-bulandī pastī hai

maiñ ne jo raaz zamāne se chhupānā chāhā!
tū ne āfāq pe us raaz kā dar khol diyā

kaleje se lagā kar rakhte ham bhī
hameñ vo raaz apne sauñptā to

yaqīnan rāz-e-dil maiñ khol dūñgā
diyā apnā jo us ne vāsta to

hamāre raaz meñ shāmil rahe paḌosī bhī
isī liye to haiñ dīvār-o-dar dar-o-dīvār

ye baat kyā hai ye mājrā kyā ye raaz kyā hai ye vāqi.a kyā
ki haañ meñ haañ sab milā rahe haiñ vo kar rahe haiñ sifāt merī

dāstān-e-ġham se lākhoñ dāstāneñ ban ga.ī
phir bhī vo ik rāz-e-sar-basta rahā jo dil meñ thā