Tags-Raaz

ek charāġh ko mahram-e-rāz kiyā jaa.e

jis raaz meñ shāmil hai hamārā bhī fasāna
us raaz ko kyā ham pe bhī ifshā na karoge

ta.amīr-e-nau hai parda-e-taḳhrīb meñ nihāñ
samjhe haiñ rāz-e-dahr ye daur-e-jahāñ se ham

rakho vo sheva na madd-e-nazar nazar meñ rahe
ki jis se rāz-e-mohabbat bashar bashar meñ rahe

nañg hai rāz-e-mohabbat kā numāyāñ honā
mar bhī jā.ūñ maiñ agar tum na pareshāñ honā

koī nahīñ ki jise āshnā-e-rāz kareñ
to kyuuñ na phir ġham-e-dil hī se sāz-bāz kareñ

ik raaz hai ye bhī ki tirī teġh kā paanī
chashma hai shahīdoñ ke liye āb-e-baqā kā

bahut muḳhtasar sā ta.āruf hai merā
na josh-e-junūñ huuñ na rāz-e-nihāñ huuñ

unhīñ meñ raaz haiñ gul-bāriyoñ ke
maiñ jo chiñgāriyāñ barsā rahā huuñ

muddatoñ rahtā hai jab aadmī zahmat-ba-kanār
rāz-e-sar-basta mahākāt kā vā hotā hai

charāġh-e-bazm haiñ ham rāz-dār-e-sohbat-e-bazm
bujhā diye ga.e haiñ yā jalā diye ga.e haiñ

ye raaz marne se pahle to khul nahīñ saktā
sulā diye ga.e haiñ yā jagā diye ga.e haiñ

ek harf-e-rāz dil par aa.ina hotā huā
ik kohar chhā.ī huī manzar-ba-manzar aur maiñ

chaar agar yaar haiñ to das dushman
raaz dil kā na jā-ba-jā kahiye

dil par gahrā naqsh hai sāthī laakh tirī dānā.ī kā
saat samundar bhī to na paa.eñ raaz mirī gahrā.ī kā

kisī se rāz-e-mohabbat na āshkār kiyā
tirī nazar ke badalne tak intizār kiyā

mujhe rāz-e-ishq ke zabt meñ jo maza milā hai na pūchhiye
mai-e-añgbīñ kā ye ghūñT thā ki gale se mere utar gayā

khul gayā raaz sitāre haiñ baġhāvat ke nishāñ
raat kyuuñ ḳhauf ke āsār liye phirtī hai

dil bhī nahīñ hai mahram-e-asrār-e-ishq dost
ye rāzdāñ bhī halqa-e-bairūn-e-dar hai aaj

har rāzdāñ hai hairatī-e-jalva-hā-e-rāz
jo bā-ḳhabar hai aaj vahī be-ḳhabar hai aaj