Tags-Raaz

apnī ḳhabar kahāñ unheñ jin pe khulā hai rāz-e-ishq
saare shu.ūr miT ga.e jab huā imtiyāz-e-ishq

siine meñ dil hai dil meñ daaġh daaġh meñ soz-o-sāz-e-ishq
parda-ba-parda hai nihāñ parda-nashīñ kā rāz-e-ishq

mirī gahrā.iyoñ meñ raaz tere
maiñ barsā huuñ ghaTā hone se pahle

maiñ rāz-e-ishq ko rusvā karūñ ma.āz-allāh
ye baat aur hai dil par na iḳhtiyār rahe

ruuh kā dasht vahī jism kā vīrāna hai
har nayā raaz purānā lagā baasī niklā

yahī nizām-e-jahāñ hai yahī hai rāz-e-baqā
samar hayāt-e-shajar ke sivā kuchh aur nahīñ

sharārat kā ye nazzāra mirī hairat kā sāmāñ thā
ki is parda ke andar terā rāz-e-ishq uryāñ thā

sī liyā chāk-e-dahan raaz chhupāne ko magar
ashk āñkhoñ ne musalsal jo bahā.e na chhupe

raaz to khul gayā zamāne par
aur vo rāz-dāñ abhī tak hai

un se sab haal daġhābāz kahe dete haiñ
mere hamrāz mirā raaz kahe dete haiñ

ik faqīr-e-be-navā ne mujh ko samjhāyā ye raaz
dard kī daulat ke aage hech haiñ maal o manāl

ġhair ko rāz-dār kyā kartā
maiñ 'bashīr' aap se bhī Dartā huuñ

hichkiyoñ se rāz-e-ulfat khul gayā
aa ga.ī muñh par jo dil meñ baat thī

duā ham-zād ho saktī diyā hamrāz ho saktā
maiñ vīrānī pe itnā to asar-andāz ho saktā

alfāz na āvāz na hamrāz na dam-sāz
ye kaise dorāhe pe maiñ ḳhāmosh khaḌī huuñ

maiñ to ik kāñch ke dariyā meñ bahī jaatī huuñ
khankhanāte hue hamrāz mujhe sun lo nā

khul jaa.e na āñkhoñ se kahīñ rāz-e-mohabbat
achchhā hai ki tum ḳhud mujhe mahfil se uThā do

din na pā jaa.e kahīñ shab kā raaz
sub.h se pahle uThā lo ham ko

chāroñ khoñT phirā huuñ lekin apne aap ko pā na sakā
ghar aa kar ye raaz khulā hai samt-o-safar meñ kuchh bhī nahīñ

vo husn hai use zebā tamām rāz-o-niyāz
maiñ ishq huuñ mujhe shikva gila qubūl nahīñ