Tags-Raaz

vaqt abhī paidā na huā thā tum bhī raaz meñ the
ek shikasta sannāTā thā ham āġhāz meñ the

mahfil meñ tum aġhyār ko duz-dīda nazar se
manzūr hai pinhāñ na rahe raaz to dekho

jahāñ kī rañgīniyoñ kī hamrāz aañkh patthar banī huī hai
ye haal ab ho gayā hai dil kā na ro sakeñ ham na muskurā.eñ

raaz kuchh nahīñ khultā is ajab nagar kā yaañ
suud meñ na thā din bhī raat bhī ziyāñ meñ hai

dahr pe maiñ khulā nahīñ mujh ko ḳhudā milā nahīñ
aap hī apnā raaz huuñ aap hī apnā rāz-dāñ

judā.ī meñ agar āñkheñ na rotīñ
to hargiz rāz-e-dil ifshā na hotā

hamesha aadmī kā aadmī ġham-ḳhvār hotā hai
yahī be-e'tibārī ho to koī rāzdāñ kyuuñ ho

kyā ifshā na rāz-e-ġham kisī par jīte-jī 'fāriġh'
baḌe sabr-o-tahammul se basar kī zindagī maiñ ne

hayā-e-rūh gul-e.azāz bhī hai
shu.ūr-e-zindagī kā raaz bhī hai

mohabbat rāz-andar-rāz bhī hai
kahīñ ye soz bhī hai saaz bhī hai

chubhegā kyā dil-e-pur-ḳhūñ kā raaz āñkhoñ se
jo hogā shīshe meñ aa.egā vo piyāloñ meñ

mash.hūr rāz-e-ishq hai kis ke bayān se
merī zabān se ki tumhārī zabān se

khultā nahīñ hai raaz hamāre bayān se
lete haiñ dil kā kaam ham apnī zabān se

kuchh ek raaz to vājib haiñ is jahāñ ke liye
har ek baat na 'āzād' ishtihārī rakh

rāz-e-dil kyuuñ na kahūñ sāmne dīvānoñ ke
ye to vo log haiñ apnoñ ke na begānoñ ke

ḳhud-baḳhud rāz-e-mohabbat munkashif kartā rahā
vo gulābī aks jo raqsāñ tire gāloñ pe thā

rahā huuñ vāqif-e-rāz-e-haqīqat
ba-zāhir be-ḳhabar pāgal rahā huuñ

bhalī thī taqdīr yā burī thī ye raaz kis tarah se ayaañ ho
butoñ ko sajde kiye haiñ itne ki miT gayā sab likhā jabīñ kā

yuuñ muskurā ke tirā āñsuoñ ko pī jaanā
koī to raaz hai ai 'ramz' aise jiine meñ

lab-e-ḳhāmosh meñ pinhāñ hai koī raaz nahīñ
zindagī saaz hai jis meñ koī āvāz nahīñ