Tags-Raaz

jise jatan se rakhā dil hī dil meñ vaqt-e-junūñ
vo raaz shahr meñ har ek kī zabān pe hai

mahrūmī-e-jāved ne donoñ hī ko maarā
ye rāz-e-mohabbat koī gahrā to na niklā

sat.h pe taaza phuul haiñ kaun samajh sakā ye raaz
aag kidhar kidhar lagī sho.ala kahāñ kahāñ gayā

rāz-e-ḳhirad ho kuchh bhī ab rāz-e-junūñ to ye hai bas
aañkh thī be-basar rahī tiir thā be-kamāñ gayā

phir hai 'shāhīn' ġhazal rāz-e-chaman
phir koī soḳhta-par yaad aayā

majrūh to kar saktā nahīñ tere yaqīñ ko
ai dost magar fitrat-e-hamrāz hai mujh meñ

poshīda ajab ziist kā ik raaz hai mujh meñ
be-par huuñ magar jur.at-e-parvāz hai mujh meñ

use laag ishq kī kahte haiñ use aag ishq kī kahte haiñ
na junūn hai ye junūn meñ na koī ye raaz hai raaz meñ

'arsh' kis se kahūñ maiñ dil kā raaz
raaz hai rāz-dāñ nahīñ miltā

arz-o-samā ke rāz-e-darūñ se huuñ āshnā
goyā sharīk-e-mahfil-e-shams-o-qamar huuñ maiñ

kisī hikmat se kar de koī goyā marne vāloñ ko
ye raaz ab tak hai sar-basta ki mar jaane pe kyā guzrī

khul pā.egā kab uqda-e-rāz-e-dil-e-bulbul
rahne do use kaam mirā mere liye hai

haañ isī kam-baḳht dil ne kar diyā ifshā-e-rāz
haañ isī kam-baḳht dil ne mujh ko rusvā kar diyā

jaane kitne raaz khuleñ jis din chehroñ kī raakh dhule
lekin sādhū-santoñ ko dukh de kar paap kamā.e kaun

raaz hastī kā hai kyā maqsad-e-hastī kyā hai
hal talab haiñ ye savālāt tumheñ kyā ma.alūm

ai dil kabhī kahne kā nahīñ rāz-e-mohabbat
is dasht meñ dauḌā na tabī.at ke faras ko

bulā rahe haiñ ufuq par jo zard-rū Tiile
kaho to ham bhī fasānoñ ke raaz ho jaa.eñ

harī zamīn sulagne lagī to raaz khulā
ki jal gayā vo shajar shāmiyāna hotā huā

ai 'shauq' kahe detī hai kuchh shakl ḳhamoshī
chup kyuuñ ho agar dil meñ koī raaz nahīñ hai

rāz-e-dil haiñ pūchhte aur bolne dete nahīñ
baat muñh par aa rahī hai lab hilānā hai manā