Tags-Raaz

zabt-e-rāz-e-ġham pe sau jāneñ bhī kar dete nisār
kyā batā.eñ bas zabāñ par un kā naam aa hī gayā

ghuum kar dekhte ho duniyā ko
rāz-e-kaun-o-makāñ samajhte ho

jo hamāre zikr ko ham se bhī poshīda rakhe
ab hameñ bhī chāhiye ik rāz-dāñ kuchh muḳhtalif

maiñ ne chhupāyā laakh magar ashk-e-ġham ne aah
ai 'rāz' rāz-e-shauq kā iz.hār kar diyā

mar ga.e lekin na rāz-e-dil khulā
aah bhī lab tak na aa.ī dekhiye

chhupā luuñ rāz-e-dil kitnā hī ik din khul ke rahtā hai
to phir be-kār hai duniyā se chhupne aur chhupāne meñ

kahtā thā kal vo mahram-e-rāz apne se ki aah
dard-e-judā.i-e-'asad'-ullāh-ḳhāñ na pūchh

mire hosh-rubā ne hai fazl kiyā mujhe rāz-e-ḳhudā.ī apnā diyā
mirī ruuh meñ ruuh milā ke kahā tū aur nahīñ maiñ aur nahīñ

harīm-e-nāz meñ kyā baat thī jo raaz rahī
vo harf kyā thā jo bār-e-digar kahā na gayā

kam-baḳht nai sab khol diye rāz-e-mohabbat
ye kis ne kahā thā tujhe 'beḳhud' ko pilā de

ḳhud ishq hī ko de ga.e rusvā.iyoñ ke daaġh
vo rāz-e-husn ham jinheñ ifshā na kar sake

mansūr jo hotā ahl-e-nazar to da.avā-e-bātil kyuuñ kartā
us kī to zabāñ khultī hī nahīñ jo raaz kā mahram hotā hai

sab hasratoñ ko rāz-e-mohabbat banā chukā
ab sochtā huuñ lā.eq-e-iz.hār kaun hai

umr be-sūd kaT rahī hai 'faiz'
kaash ifshā-e-rāz ho jaa.e

ishq dil meñ rahe to rusvā ho
lab pe aa.e to raaz ho jaa.e

nigāh-e-lutf se dekho na ahl-e-dil kī taraf
diloñ ke raaz zabānoñ pe aa.e jaate haiñ

yak-tarfa mohabbat ke tazabzub se to niklūñ
is raaz se parda vo haTā kyuuñ nahīñ detā

nigāh-e-shauq vaqf-e-husn-e-fitrat hotī jaatī hai
tabī.at mahram-e-rāz-e-mohabbat hotī jaatī hai

husn ko bad-gumān rahne de
rāz-e-dil rāz-dān rahne de

jin ko apnī ḳhabar nahīñ ab tak
vo mire dil kā raaz kyā jāneñ