Tags-Raaz

kyā kaheñ mohabbat kā raaz kam-nigāhoñ se
ham ne dil banā.e haiñ āñsuoñ se aahoñ se

laayā hai mirā shauq mujhe parde se bāhar
maiñ varna vahī ḳhalvatī-e-rāz-e-nihāñ huuñ

zarre kā raaz mehr ko samjhānā chāhiye
chhoTī sī koī baat ho laḌ jaanā chāhiye

gaah shorīda-sar gaah ḳhāmosh-tar tujh meñ poshīda haiñ raaz sab basta-sar
tere lāl-o-gohar aur maiñ ḳhāk-sar tū samundar hai maiñ sāhiloñ kī havā

apnoñ ko tum chhoḌ ke 'rahbar'
kahāñ chale ye raaz batāo

mustanad mo.atamad-e-dil nahīñ ab koī yahāñ
mahram-e-rāz bhī mahrūm-e-sanad hai had hai

āñdhī meñ barg-e-gul kī zabāñ se 'adā' huā
vo raaz jo kisī se abhī tak kahā na thā

aish-e-bazm-e-be-ḳhudī josh-e-fuġhāñ ho jā.egā
ham kahāñ hoñge jo rāz-e-ġham ayaañ ho jā.egā

raaz kyuuñ saare zamāne pe ayaañ karte ho
āñsūo zid na karo ghar se nikalne ke liye

ḳhudī kī fitrat-e-zarrīñ ke rāz-hā-e-darūñ
adā-shanās haqīqat mile koī to kahūñ

mirī nazar meñ hai rāz-e-darūn-e-mai-ḳhāna
magar ye soch rahā huuñ kahūñ to kis se kahūñ

jab aa.ī shām-s-masāfat to phir ye raaz khulā
zarā sī der uruuj o zavāl hotā hai

aql vaalo kuchh kaho ye rishta-e-rāz-e-hayāt
kyuuñ ulajhtā jaa.e hai jitnā ki khultā jaa.e hai

rāz-e-ġham faash na ho is liye rokī thī zabāñ
chup bhī rah kar yahī hogā mujhe ma.alūm na thā

amīn-e-rāz hai mardān-e-hur kī darveshī
ki jibra.īl se hai us ko nisbat-e-ḳhveshī

maiñ tirī tahqīr kar saktā nahīñ ai zabt-e-shauq
mere siine meñ rahegā raaz jo siine meñ hai

kisī ne tujh ko na jaanā magar ye kam jaanā
ye raaz hai ki koī rāz-dāñ nahīñ miltā

ham aaj tak chhupāte haiñ yāroñ se rāz-e-ishq
hālāñki dushmanoñ se ye qissa nihāñ nahīñ

kyā pās-e-ishq hai ki muue par bhī rāz-e-ishq
sar-basta vuuñ hī har qalam-e-ustuḳhvāñ meñ thā

hayāt-o-fanā kā ye kyā silsila hai
nahīñ raaz afshāñ huā ye azal se