Tags-Raaz

bahut se raaz diloñ ke diloñ meñ rahte haiñ
use batāne kī har baat thoḌī hotī hai

samā.atoñ ke liye raaz chhoḌ aa.e haiñ
ham us ke shahr meñ āvāz chhoḌ aa.e haiñ

zabt karte to ek ik zarra
raaz apnā ugalne vaalā thā

raaz kahāñ tak raaz rahegā manzar-e-ām pe aa.egā
jī kā daaġh ujāgar ho kar sūraj ko sharmā.egā

rāz-poshī merī dūd-e-āh kī
dūd-e-qulyāñ kar jo tujh se ho sake

rāz-e-dil zāhir na ho ai dūd-e-āh
daaġh pinhāñ kar jo tujh se ho sake

tark-e-ulfat ke sun liye ilzām
rāz-e-dil ko chhupā ke dekh liyā

na vo soz hai na vo saaz hai na vo dil ḳhazāna-e-rāz hai
vo sharar huuñ jis meñ dhuāñ nahīñ vo hajar huuñ jis meñ sharar nahīñ

umr-bhar karte rahe 'almās' milne se gurez
kījiye tahqīq kyuuñ vo raaz sar-basta rahe

dil-o-dimāġh meñ ik raushnī sī dar aa.ī
har ek ghūñT pe kuchh zindagī ke raaz khule

is raaz ko rakh jī hī meñ tā jī bache terā
zinhār jo kartā ho tū iz.hār-e-mohabbat

go nahīñ rahtā kabhī parde meñ rāz-e-āshiqī
tum ne chhup kar aur bhī us ko numāyāñ kar diyā

ilāhī sharam rakhnā rāz-e-dil kī
kisī kā naam lab par aa rahā hai

jise bhed kahte ho raaz hai jise baajā kahte ho saaz hai
jise taan kahte ho hai navā tumheñ yaad ho ki na yaad ho

tire dayār meñ koī bhī ham-zabāñ na milā
hazār naqsh mile koī rāzdāñ na milā

ye havā ye barg-e-gul kā ehtizāz
aaj maiñ rāz-e-musarrat pā gayā

faqat tum se hī kartā huuñ maiñ saarī raaz kī bāteñ
har ik ko dāstān-e-dil sunā kar kuchh nahīñ miltā

sab raaz ta.ashshuq'' se bayāñ hote the dil ke
pahle tire ik mahram-e-asrār hamīñ the

ḳhamoshī kī girah khole sar-e-āvāz tak aa.e
ishāra koī to samjhe koī to raaz tak aa.e

rāz-āshnā hai merī nazar yā phir aa.ina
varna vo apne husn ke ḳhud rāz-dāñ na the