Tags-Raaz

terī muḳhbir terī hī hamrāz kanīz
merī dushman merī ek sahelī thī

merā har sher hai ik rāz-e-haqīqat 'beḳhud'
maiñ huuñ urdu kā 'nazīrī' mujhe tū kyā samjhā

vahī hai kāmrāñ āshiq jo us ko paar kar jaa.e
diloñ ke darmiyāñ jo ik jahān-e-rāz hotā hai

maiñ huuñ shākī o nāzāñ to faqat is rasm-e-duniyā se
vahī ġhammāz ho jaatā hai jo hamrāz hotā hai

ishāre kaam karte haiñ mohabbat meñ nigāhoñ ke
nigāhoñ se hī bāham inkishāf-e-rāz hotā hai

sau zabānoñ par bhī ḳhāmoshī tujhe manzūr hai
raaz vo kyā hai tire siine meñ jo mastūr hai

mahfil-e-dost meñ chaltā to huuñ ai dīda-e-shauq
ishq kā raaz na afsana-e-mahfil ho jaa.e

nishāñ denā hai maiñ ne kuchh ġhubār-ālūd samtoñ kā
koī kaafī purānā raaz tasht-az-bām karnā hai

safha-e-dahr pe ik raaz kī tahrīr huuñ maiñ
har koī paḌh nahīñ saktā jo likhā hai mujh meñ

vo harf-e-rāz ki mujh ko sikhā gayā hai junūñ
ḳhudā mujhe nafas-e-jabra.īl de to kahūñ

fasīl-e-ḳhvāb pe sīḌhī lagāne vaalā huuñ
maiñ ek raaz se parda uThāne vaalā huuñ

zulf-e-ḳhūbāñ kī tarah dehlī kī saḌkeñ haiñ darāz
aur Tāñga hāñkne vāloñ pe zāhir hai ye raaz

maiñ sar se pā tak huuñ mai-parastī tamām shorish tamām mastī
khulā hai mujh par ye rāz-e-hastī ki mujh ko kuchh bhī ḳhabar nahīñ hai

ye mujh se sun le to rāz-e-pinhāñ salāmtī ḳhud hai dushman-e-jāñ
kahāñ se rāh-rau meñ zindagī ho ki raah jab pur-ḳhatar nahīñ hai

kisī badmast ko rāz-āshnā sab kā samajhte haiñ
nigāh-e-yār tujh ko kyā batā.eñ kyā samajhte haiñ

rāz-e-taḳhlīq-e-ġhazal ham ko hai ma.alūm 'nasīm'
jaam ho mai ho sanam ho to ġhazal hotī hai

vo mujh se is liye kahte haiñ apne raaz kī baat
ki mere ba.ad koī rāzdāñ rahe na rahe

nigah ḳhamosh takallum kī rāzdāñ hogī
huzūr-e-dost ye goyā zabāñ rahe na rahe

badnām kar diyā mujhe 'afqar' zamāne meñ
iḳhfā-e-rāz dīda-e-giryāñ na kar sake

jism merā thā magar ruuh kā mālik thā aur
kaisī ayyārī kā ye raaz khulā tere ba.ad