Tags-Raaz

maane hoñ kyuuñ ki girya-e-ḳhūnīñ ke ishq meñ
hai rabt-e-ḳhās chashm ko ifshā-e-rāz se

kahīñ to dasht meñ Thahregī mauj-e-āb-e-gurez
ravāñ huā hai to rāz-e-sarāb khol ke dekh

mujhe dekh kar kal vo hañstā rahā
to vo bhī mire rāz-dānoñ meñ thā

mire in qahqahoñ kā raaz samjho
basā-auqāt hañstī maiñ nahīñ huuñ

vahī sadiyoñ purānī, aam aurat
anokhā rāz-e-hastī, maiñ nahīñ huuñ

ashkoñ ke guhar yuuñ sar-e-mizhgāñ bhī na toleñ
in āñkhoñ se kah do ki abhī raaz na kholeñ

rāzdān-e-zindagī ai tarjumān-e-zindagī
hai tirā har lafz zinda dāstān-e-zindagī

rag-e-jāñ se bhī jo nazdīk aatā jā rahā hai
maiñ kyā sach-much use hamrāz karnā chāhtā huuñ

shab ko vo ḳhud supurdagī us kī
jaise ik raaz khul gayā mujh meñ

nahīñ ye jalva-hā-e-rāz-e-irfāñ dekhne vaale
tumheñ kab dekhte haiñ kufr-o-īmāñ dekhne vaale

mirī dāstāñ bhī ajiib hai vo qadam qadam mire saath thā
jise rāz-e-dil na batā sakā jise dāġh-e-dil na dikhā sakā

'sho.ala' samajh meñ ā.eñge kyā rāz-hā-e-ishq
jab tak ki āshnā na hoñ dard-e-nihāñ se ham

raaz rakhte na ham is ta.alluq ko gar
log rote bahut log hañste bahut

sahī ifshā-e-rāz-e-ishq lekin ye musībat hai
na karte sajda tere dar par āḳhir to kahāñ karte

merī har fatah meñ hai ek hazīmat pinhāñ
har masarrat meñ hai rāz-e-ġham-o-hasrat pinhāñ

ye duniyā dekhtī rah jaa.e aisā ḳhvāb ho jā
magar tārīk lamhe kā kabhī hamrāz mat ho

apnī rusvā.iyāñ mujhe manzūr
tū agar merā rāz-dāñ ho jaa.e

fuzūl raaz mohabbat kā sab chhupāte haiñ
bujhā.e jo na bujhe aag vo bujhāte haiñ

mirā vajūd-o-adam raaz hai hamesha se
vahāñ vahāñ bhī nahīñ huuñ jahāñ jahāñ huuñ maiñ

tirī nigāh ne aisī nazākateñ pā.īñ
ki husn ḳhud hī pukārā ki maiñ huuñ ishq kā raaz