Tags-Rang

rañg aa jaate muTThī meñ jugnū ban kar
ḳhushbū kā paikar hotā to achchhā thā

rañg-e-tābīr chamaktā hī nahīñ āñkhoñ meñ
raat bhar ḳhvāb kā bāzār sajā rahtā hai

oḌhte hue ye tā.ir-e-rañg apnā jo dekhā
to hosh bajā rūh-e-amīñ ke na raheñge

rañg-e-bahār par na phuul bū-e-chaman se darguzar
ye bhī haiñ ḳhushnumā fareb-e-dāna-o-dām ke sivā

hijāb-e-rañg-o-bū hai aur maiñ huuñ
ye dhokā thā ki tū hai aur maiñ huuñ

khulne ke intizār meñ jo zard ho ga.ī
rañg-e-sulūk bād-e-sabā us kalī se pūchh

hai rañg siyāhī liye juuñ us kī hinā kā
hāthoñ pe har ik ke ye udāhaT nahīñ aatī

mai-chakāñ bāda-nishāñ the lab-e-gul-rañg kabhī
lab-e-gul-rañg pe zaḳhmoñ kā gumāñ hai ki nahīñ

har nazar naġhma-sarā anjuman-ārā thī kabhī
har nazar hairatī-e-rañg-e-jahāñ hai ki nahīñ

ye tarz-e-fikr ye rañg-e-suḳhan kahāñ 'qābil'
tire kalām se pahle tire kalām ke baad

mire dil ke ḳhuun kī misl thā tujhe yaad hai mire dilrubā
koī rañg rañg-e-hinā bhī thā tire naqsh-hā-e-jamāl meñ

ruḳhsār par hai rañg-e-hayā kā faroġh aaj
bose kā naam maiñ ne liyā vo nikhar ga.e

huī na jazb zamīñ meñ to raat kī bārish
fazā meñ phail ga.ī ḳhaak rañg-o-bū ho kar

ham na badle the na badle haiñ na badleñge 'shakīl'
ek hī rañg meñ har baar nazar aate haiñ

jin kī āñkhoñ se chhalaktā thā kabhī rañg-e-ḳhulūs
in dinoñ mā.il-e-takrār nazar aate haiñ

pahle bhar lete haiñ kuchh rañg tumhāre us meñ
aur phir ham usī tasvīr kā sar kāTte haiñ

jo kaam mujh se nahīñ ho sakā vo tū karnā
jahāñ meñ apnā safar misl-e-rañg-o-bū karnā

juz dāġh-e-zindagī meñ nahīñ aur kuchh surūr
afyūn kab hai lāla-e-rañg-e-sabāt meñ

qaa.em mizājiyoñ meñ bhī ġhaflat muhīt hai
hai ḳhvāb-e-marg maḳhmal-e-rañg-e-sabāt meñ

bas ek buuñd ke girte hī ho gayā āzād
vo haft-rañg ujālā jo mujh hubāb meñ thā