Tags-Rang

hatheliyoñ kī duā phuul ban ke aa.ī ho
kabhī to rañg mire haath kā hinā.ī ho

lahr lahr kyā jagmag jagmag hotī hai
jhiil bhī koī rañg badaltā motī hai

kare hai baada tire lab se kasb-e-rañg-e-faroġh
ḳhat-e-piyāla sarāsar nigāh-e-gul-chīñ hai

imtedād-e-sahar-o-shām zamānoñ kī qasam
ek bhī rañg mire pyaar kā phīkā na huā

is ke lahje kā rañg agar 'nāhīd'
tere lahje pe chhā gayā to phir

terī nashāt-ḳhez fazā-e-javāñ kī ḳhair
gul-hā-e-rañg-o-bū ke hasīñ kārvāñ kī ḳhair

vo ruup rañg raag kā payām le ke aa gayā
vo kām-dev kī kamān jaam le ke aa gayā

hai sau adāoñ se uryāñ fareb-e-rañg-e-anā
barahna hotī hai lekin hijāb-e-ḳhvāb ke saath

hafīz kab unheñ dekhā nahīñ ba-rañg-e-digar
'hafīz' kab vo ba-rañg-e-digar nahīñ aa.e

uḌā hai rafta rafta rañg tasvīr-e-mohabbat kā
huī hai rasm-e-ulfat be-viqār āhista āhista

raqs hai rañg par rañg ham-raqs haiñ
sab bichhaḌ jā.eñge sab bikhar jā.eñge

pahle to sarsabz rahoge phir piile paḌ jāoge
jis din tum bhī rañg-nagar meñ surḳh koī lab dekhoge

jab bhī miltī hai mujhe ajnabī lagtī kyuuñ hai
zindagī roz na.e rañg badaltī kyuuñ hai

ba-rañg-e-naġhmā bikhar jaanā chāhte haiñ ham
kisī ke dil meñ utar jaanā chāhte haiñ ham

dil pe jo biite sah lete haiñ apnī zabāñ meñ kah lete haiñ
'inshā'-jī ham log kahāñ aur 'mīr' kā rañg-e-kalām kahāñ

āsmāñ par safar-e-mauj-e-sahar se pahle
roz uThā detī hai ik rañg kī dīvār havā

jaane kis tarah ḳhalāoñ meñ dhanak bantī hai
chāñd kī rañg bharī jhiil ke us paar havā

rañg-e-hastī hai inqalāb agar
rañg-e-hastī badal nahīñ saktā

tum ḳhud ahl-e-nazar ho ai 'sarshār'
rañg dekhā karo zamāne kā