Tags-Rang

aa rahā hai fāqa-kash mazdūr ke chehre pe rañg
khurdure hāthoñ se ab Takrā rahe haiñ jām-o-sañg

dāstān-e-ahd-e-pārīna hai zauq-e-rang-o-bū
ab chhalaktā hai ḳhum-o-sāġhar se insāñ kā lahū

fareb-e-rañg-o-bū-e-dahr mat khā mard-e-āqil ho
samajh ātish-kada is gulshan-e-shādāb-e-duniyā ko

maiñ bahāroñ ke rañg meñ Dhal kar
manzar-e-bostāñ meñ rahtā huuñ

itnā ḳhizāñ kare hai kab zard rañg par yaañ
tū bhī kaso nigah se ai gul judā rahā hai

so.e to yaad qaus-e-quzah meñ simaT ga.ī
jaage to jitne rañg the vo laḳht laḳht the

tum kah rahe ho niile ḳhalā meñ rañgoñ kā jaal phailā hai
maiñ pūchhtā huuñ rañgoñ ke paar paanī kā rañg kaisā hai

rañg-o-raushnā.ī kī hadd-e-auj se uupar
ho sake to andāzan qāmat-e-kashīda likh

baat meñ kohna rivāyāt kā lutf
haath par rañg-e-hinā baaqī hai

hai rañg-e-lāla-o-gul-o-nasrīñ judā judā
har rañg meñ bahār kā isbāt chāhiye

rañg rah rah ke tire ruḳh kā uḌā jaatā hai
varna maiñ aur tirī mahfil-e-tamkīñ se uThūñ

nīm-rañg us kī hinā dekh na marte gar ham
phuul turbat ke hamāre na gulābī hote

huī jo sub.h to be-barg-o-bār the ashjār
tamām raat havā kā ajiib rañg rahā

phir kisī ke sāmne chashm-e-tamannā jhuk ga.ī
shauq kī shoḳhī meñ rañg-e-ehtarām aa hī gayā

dī aag rañg-e-gul ne vaañ ai sabā chaman ko
yaañ ham jale qafas meñ sun haal āshiyāñ kā

girye pe rañg aayā qaid-e-qafas se shāyad
ḳhuuñ ho gayā jigar meñ ab daaġh gulsitāñ kā

āḳhir mire siine ke bhī nāsūr bhareñge
ye baaġh sadā rañg dikhātā na rahegā

ye bhī urūj-e-rañg kā ik mo.ajiza sahī
phūloñ kī tāzgī ko faroġh-e-sharar kaho

jis ġhuncha-lab ko chheḌ diyā ḳhanda-zan huā
jis gul pe ham ne rañg jamāyā chaman huā