Tags-Rang

ḳhudā kā shukr duā.eñ jo rañg laa.ī haiñ
likhūñgī lafz maiñ jo bhī vo barmalā hogā

rañg 'mumtāz' chehre kā aisā khilā zindagī meñ nayā hādisa ho gayā
aa.ina aur maiñ donoñ hairān the maiñ bhī sharmā ga.ī vo bhī sharmā gayā

uḌ gayā rañg ruḳh-e-mausam-e-gul kā kyā kyā
ḳhushk patte jo kabhī bād-e-sabā se khele

rañg mahloñ ke hasīñ ḳhvāb se bach kar rahnā
hai ḳhabar garm ki ḳhvāboñ kī tijārat hogī

bikhar ga.e jo kabhī chashm-e-intizār ke rañg
is anjuman se ham ik aur ḳhvāb le aa.e

ḳhayāl aatā hai jab bhī dilbaroñ kī ham-nashīnī kā
talātum rañg ke ḳhushbū ke tūfāñ yaad aate haiñ

bas vahī ik be-kaif udāsī bas vahī banjar sannāTā
sau sau rañg milan ke dekhe ek hī rañg judā.ī kā

vo shāḳh shāḳh niile piile laal rañg kyā hue
tamām dasht ke parind zaaġh ban ke rah ga.e

ham gunahgāroñ ke kyā ḳhuun kā phīkā thā rañg
mehñdī kis vāste hāthoñ pe rachā.ī pyāre

kitne be-kaif kis qadar be-rañg
kis kī taḳhlīq kā husūl haiñ ham

apnā lahū hī rañg hai apnī tapish hī bū
ho fasl-e-gul ki daur-e-ḳhizāñ bolte raho

mirī chāhat meñ bhī ab soch kā rañg aane lagā
aur tirā pyaar bhī shiddat meñ huā āhista

ḳhvāb jal jaa.eñ mirī chashm-e-tamannā bujh jaa.e
bas hathelī se uḌe rañg-e-hinā āhista

shāyad ik bhūlī tamannā miTte miTte jī uThe
aur bhī is jalva-zār-e-rañg-o-bū meñ ghūmiye

lab-e-nāzuk ke bose luuñ to missī muñh banātī hai
kaf-e-pā ko agar chūmūñ to mehñdī rañg laatī hai

parda-e-rañg-o-bū to uThāo
hogā koī na koī zarūr

ālam-e-rañg-o-bū ko sajāyā gayā
is tamāshe meñ taqsīr thī hī nahīñ

rañg se rañg judā hone kā manzar dekhā
tīrgī aur shafaq sirf bahāne nikle

haañ batā de ham ko bhī ai rūh-e-arbāb-e-niyāz
kis tarah miTtā hai āḳhir rang-o-ḳhūñ kā imtiyāz

ghar bhī vīrāna lage taaza havāoñ ke baġhair
bād-e-ḳhush-rañg chale dasht bhī ghar lagtā hai