Tags-Rang

chehre na.e andāz na.e taur na.e haiñ
duniyā hai ye sau rañg badaltī hī rahegī

yak-rañg huuñ maiñ us gul-e-ra.anā ke ishq meñ
bulbul na huuñ ki DhūñDūñ gulsitān dūsrā

barse haiñ kis ke ḳhuun ke bādal chaman chaman
laa.ī kahāñ se rañg ye pūchho bahār se

ye kyā ki sirf rañg gulistāñ badal diyā
ham ne kuchh aur bhī to kahā thā bahār se

ek manzil hai muḳhtalif rāheñ
rañg haiñ be-shumār phūloñ ke

rañg laa.ī hai hasrat-e-tāmīr
gir rahī haiñ imārateñ kyā kyā

kasī ke 'anjum' jo haiñ sikhā.e to haiñ nayā rañg aaj laa.e
ki chupke baiThe haiñ sar jhukā.e na bolte haiñ na chālte haiñ

shaam ke haath ne jis vaqt lagā lī mehñdī
mujhe us vaqt tirā rañg-e-hinā yaad aayā

kisī kā ras koī parvāz-e-rañg kī manzil
azār-e-lāla-e-sahrā kī tāzgī kyā hai

rañg-e-tahzīb-o-tamaddun ke shanāsā ham bhī haiñ
sūrat-e-ā.īna marhūn-e-tamāshā ham bhī haiñ

dekhnā hai dekh lo uThtī huī mahfil kā rañg
subah ke bujhte charāġhoñ kā sambhālā ham bhī haiñ

dhuup meñ sab rañg gahre ho ga.e
titliyoñ ke par sunahre ho ga.e

afsurdagi-e-dil se ye rañg hai suḳhan meñ
ya.anī ḳhizāñ-rasīda kuchh phuul haiñ chaman meñ

maiñ bhī rādhā se koī kam to nahīñ huuñ 'shabnam'
sāñvle rañg kā merā bhī to girdhārī hai

simaT gayā mirī bāhoñ meñ jab vo paikar-e-rañg
to is kā rañg mujhe duur tak nazar aayā

ye kaun ābla-pā is taraf se guzrā hai
nuqūsh-e-pā meñ jo phūloñ ke rañg bhar aayā

shām-e-vidā.a thī magar us rañg-bāz ne
paañv pe hoñT rakh diye jaane nahīñ diyā

kitnā hasīñ thā jurm-e-ġham-e-dil ki do-jahāñ
dar pe haiñ aaj tak mire rañg-e-qubūl ke

phir umīdoñ ne yahīñ gaaḌ diye haiñ ḳheme
rañg kuchh uḌte hue dāman-e-sahrā meñ mile