Tags-Rang

chehre kā rañg dekh lo tum rakh ke aa.ina
bose se dauḌ jā.egī surḳhī shahāb kī

āñkhoñ meñ ghul na jaa.eñ kahīñ zulmatoñ ke rañg
jis samt raushnī hai udhar dekhte raho

tausan ne terī nāzukī gulshan meñ ḳhatm kī
aaj āb-o-rañg-e-gul kī havas par havā se bahs

maiñ us kā haath dekh rahā thā ki daf.atan
simTā simaT ke rañg-e-hinā ho gayā vo shaḳhs

'zeb' maujoñ meñ lakīroñ kī vo ġham thā kab se
gardish-e-rañg ne paikar ko uchhālā kaisā

ḳhush-rañg parindoñ ke lauT aane ke din aa.e
bichhḌe hue milte haiñ jab barf pighaltī hai

muḳhtalif rañg haiñ mire 'ābid'
kabhī jalva kabhī hijāb huuñ maiñ

vahī ḳhvājgī vahī khusravī vahī rañg-o-nasl kī bartarī
yahī hai tamaddun-e-maġhribī koī mujh se sun le kharī kharī

rañg huuñ giit huuñ naġhma huuñ maiñ ḳhushbū huuñ 'shakīl'
ziist hī ziist hai bikhrī huī har jā mujh meñ

qāfila qāfila maqtal kī taraf jā.eñge log
shoḳh pahle se bahut rañg-e-hinā hai ab ke

ḳhaas ko rañg aam dikhā
adnā.ī se aalā maar

chalte chalte us kā āñchal chhū ke aisā guzrā hai
mere jism pe kaale rañg kī shirt kā collar chauñk paḌā

maut ne chhīn liyā rañg bhī nam bhī 'ḳhālid'
aañkh bhī suukh ga.ī hoñT bhī niile na rahe

hai shab-e-mahtāb gore rañg se kapḌe siyāh
husn ko chamkā rahī hai sogvārī aap kī

sharmā rahe haiñ tār-e-garebān-e-chāk-e-dil
kuchh din se rañg-e-lāla-e-sahrā ajiib hai

tum aa.e kyā ki rañg-e-zamāna badal gayā
gul ho gayā charāġh hamāre mazār kā

rañg lā.eñgī tamannā.eñ zarā sabr karo
vaqt lagtā hai duāoñ ko asar karne meñ

adhūrī chhoḌ ke tasvīr mar gayā vo 'zeb'
koī bhī rañg mayassar na thā lahū ke sivā

maiñ pūchhtā huuñ ki ai rañg-o-nūr kī devī
ilāj-e-tīra-shabī kyā isī ko kahte haiñ

mujhe saaf batā.e nigār agar to ye pūchhūñ maiñ ro ro ke ḳhūn-e-jigar
male paañv se kis ke haiñ dīda-e-tar kaf-e-pā pe jo rañg-e-hinā na rahā