Tags-Rang

nashsha-e-rañg se hai vāshud-e-gul
mast kab band-e-qabā bāñdhte haiñ

nasīm-e-sub.h chalī aur fishār-e-rañg-o-bū
kahīñ qarār na kartā huā nazar aayā

dil ke har dard ne ash.ār meñ Dhalnā chāhā
apnā pairāhan-e-be-rañg badalnā chāhā

aap ke ḳhuuñ kā rañg dekh liyā
ab adā-kāriyāñ na dikhlā.eñ

na teġh-e-qātil kā kyuuñ ho shohrā kiyā hai jo rañg-e-jism aisā
diye jo Tāñke to hai ye dhokā badan kā malbūs sozanī hai

rañg-o-bū ke pairahan meñ phuul haiñ yā zaḳhm haiñ
ab na vo kaliyāñ na vo patte na vo saayā mile

har dar-o-dīvār par likkhā huā hai merā naam
vaj.h-e-shohrat ban ga.e haiñ kitne rusvā.ī ke rañg

ho sadāqat kā jo da.avā dekh le jī aa.ina
aa.ine hī meñ nazar aate haiñ sachchā.ī ke rañg

is adā se aa ga.e haiñ vo nazar ke rū-ba-rū
aur gahre ho ga.e haiñ is dil kī bīnā.ī ke rañg

dil ke har goshe meñ jal uTThe haiñ zaḳhmoñ ke charāġh
allāh allāh ik masīhā kī masīhā.ī ke rañg

der tak 'aḳhgar' dar-e-jāñ par charāġhoñ kī tarah
raushnī dete rahe merī jabīñ-sā.ī ke rañg

dekhnā ye ishq meñ husn-e-pazīrā.ī ke rañg
anjuman-dar-anjuman hoñ merī tanhā.ī ke rañg

har nazar apnī jagah ḳhud ek jalva ban ga.ī
chhā ga.e aise tumhārī jalva-ārā.ī ke rañg

ḳhud hī rañg-e-ruḳh-e-mahbūb uḌā jaatā hai
ham to rūdād-e-ġham-e-ishq sunāte bhī nahīñ

ik aur rañg milā aa ke saat rañgoñ meñ
shuā-e-mahr paḌī jab se terī baalī par

dhānī joḌe ne tire khet rakhā hai mujh ko
sabz rañg itne to dekhe nahīñ haiñ dhaan kahīñ

mire ḳhuuñ meñ rañg-e-vafā dekh le
mujhe le ke chal tū sar-e-dār ab

shafaqī rañg pe mat bhūliyo apne ai abr
chashm-e-ḳhushk aur mizha-e-ashk-fishāñ aur hī hai

thā jo sutūñ ki rukn-e-risālat kā takiya-gāh
kursī bhī us kī pusht kī thī DhūñDhtī panāh

kis muñh se kījiye lab-e-jān-baḳhsh kā bayāñ
chūsī jinhoñ ne ahmad muḳhtār kī zabāñ