Tags-Rang

diloñ kā bhed khul gayā to phir ajiib rañg meñ
dabī dabī sī baat ko kisī ne aam kar diyā

aks bhī dīda-e-qātil meñ lahū ban ke rahā
qatl ho kar bhī jamā rañg barābar us kā

hālāñki hai ye sīli-e-ḳhārā se laala rañg
ġhāfil ko mere shīshe pe mai kā gumān hai

husn-e-fitrat kī aabrū mujh se
aab o gil meñ hai rañg-o-bū mujh se

pareshāñ karne vāloñ ko pareshāñ kaun dekhegā
hamāre ba.ad ye rañg-e-gulistāñ kaun dekhegā

rañg-birañge manzar dil meñ āñhkeñ ḳhālī ḳhālī
ham āvāz kisī ko deñ imkān kisī kā rakkheñ

dekh aariz ko tere gulshan meñ
saikḌoñ rañg gul badalte haiñ

mujh ko ābād karo mujh meñ koī rañg bharo
dil-e-muztar bhī bahāroñ kā tamannā.ī hai

ḳhanda-zan ġham par ḳhushī par ashk-bār
in dinoñ yaaro hai rañg apnā bhī kyā

vo shālīmār kī rañgīniyoñ meñ husn kā jaadū
vo duniyā-e-shabāb-o-sher vo gulzār-e-rañg-o-bū

tamām phuul se chehroñ kī surḳhiyāñ uḌ jaa.eñ
agar chaman se ye ḳhush-rañg titliyāñ uḌ jaa.eñ

duniyā-e-adab meñ ai 'jālib' apnī bhī koī pahchān to ho
'iqbāl' kā rañg uḌāne se tū ban bhī gayā 'iqbāl' to kyā

arz-o-samā pe rañg thā kaisā utar gayā
āñdhī chalī to shaam kā chehra utar gayā

har shai badal rahī hai ajab ujlatoñ meñ rañg
koī to naqsh ho jise pā.inda kah sakeñ

vo din bhī huuñ ġhubār chhaTeñ āñdhiyāñ haTeñ
aur gul ko rañg-o-bū kā numā.inda kah sakeñ

kyā kyā na hādse mire dil par guzar ga.e
lekin shaguftagī na ga.ī rañg-rūp se

niile surḳh safed sunahre ek ek karke Duub ga.e
samtoñ kī har pagDanDī par kaalā rañg pighalne lagā

aa hī ga.e haiñ raqs-gah-e-gul-ruḳhāñ meñ ham
kuchh rañg-o-bū kā sail-e-ravāñ dekhte chaleñ

numūd-e-rañg-o-bū ne maar Daalā
usī kī aarzū ne maar Daalā

sone de unheñ rañg jo so.e haiñ badan meñ
āvāra havāoñ ko na mahsūs kiyā kar