Tags-Rang

us ne pahle ruup diyā phir rañg diyā phir izn diyā
bahr o bar meñ barg o samar meñ na.e safar par niklā meñ

ham to farefta the 'ziyā' dil kī aañch par
manzūr mahz dilkashī-e-rañg-o-bū na thī

tere kūche meñ jo merā ḳhuun ho ai lāla-rū
surḳh-rū yāroñ meñ huuñ gul-rañg gulzāroñ meñ huuñ

kisī kī zulf meñ dekhā to ham ko yaad aayā
ki ek phuul usī rañg kā hamārā bhī thā

vo na jaane kyā samjhā zikr mausamoñ kā thā
maiñ ne jaane kyā sochā baat rañg-o-bū kī thī

bole vo 'hasan' kā ḳhuun mal kar
kyā shoḳh hai rañg is hinā kā

be-sāl-o-sin zamānoñ meñ phaile hue haiñ ham
be-rañg-o-nasl naam meñ tū bhī hai maiñ bhī huuñ

bazm-e-rañg-o-bū kā huuñ maiñ rāzdāñ tanhā
hai mirī zamīñ tanhā aur āsmāñ tanhā

zor dikhlā rahā hai kyā kyā rañg
vaah vā ai jahān-e-rañgā-rañg

dekh be-bāda kyā hai apnā rañg
rahm ai āsmān-e-mīnā-rang

ho ga.ī sinf se subuk aisī
le uḌā ham ko bhī hamārā rañg

dil ko ḳhayāl-e-yār ne maḳhmūr kar diyā
sāġhar ko rañg-e-bāda ne pur-nūr kar diyā

ab sub.h o shaam shāyad girye pe rañg aave
rahtā hai kuchh jhamaktā ḳhūnāb chashm-e-tar meñ

azal se hai vahī be-kaif raushnī ab tak
guloñ kā rañg sitāroñ ne kyuuñ uḌā na liyā

bevafā.ī us ne kī merī vafā apnī jagah
ḳhūn-e-dil apnī jagah rañg-e-hinā apnī jagah

jahān-e-rañg-o-bū par miTne vaalo
ye duniyā mauj hai sāhil nahīñ hai

suḳhan meñ rañg tumhāre ḳhayāl hī ke to haiñ
ye sab karishme havā-e-visāl hī ke to haiñ

kitnā ḳhush-rañg hai ma.asūm tabassum terā
muskurātī ho bahāroñ kī javānī jaise

do ghaḌī ik rañg par qaa.em nahīñ husn-e-shabāb
kyā musavvir khīñche tasvīr-e-javānī aap kī

lekin un se aur tarah kī raushniyāñ sī phuuT paḌīñ
aañsū to mil kar nikle the aañkh ke rañg chhupāne ko