Tags-Rang

agar dil meñ tamannā-e-nashāt-e-rañg-o-bū rakhnā
ma.āl-e-ḳhanda-gul ko bhī apne rū-ba-rū rakhnā

sab isī aag kā īñdhan haiñ guzarne vaale
ek hī larzish-e-sad-rañg kā partav hai tamām

ye phuul sāda-o-be-rañg hī sahī lekin
tumhāre joḌe meñ kyā ḳhushnumā sā lagtā hai

mil-jul ke ba-rañg-e-rañg-e-shīr-o-shakar donoñ ke nikharte haiñ jauhar
dariyāoñ ke sañgam se baḌh kar tahzīb kā sañgam hotā hai

rañg ke jism chhueñ nuur ke paikar dekheñ
ḳhvāb kī shahr-panāhoñ meñ utar kar dekheñ

ḳhūn-e-a.adā se na ho ḳhūn-e-shahīdāñ hī se ho
kuchh na kuchh is daur meñ rañg-e-chaman nikhrā to hai

milā jo kuuze ko āñchoñ meñ tap ke rañg-e-sabāt
vo pahle sholagi-e-kūzā-gar se aayā thā

vo rañg rañg ke chhīñTe paḌe ki is ke ba.ad
kabhī na phir na.e kapḌe pahan ke niklā maiñ

kis āftāb se tarsīl-e-nūr jaarī hai
dhanak kā rañg zamīñ par bikhar gayā kaisā

harf-e-ġhazal se rañg-e-tamannā bhī chhīn le
maiñ jal rahā huuñ ātish-e-naġhma bhī chhīn le

tum apne rañg nahāo maiñ apnī mauj uḌuuñ
vo baat bhuul bhī jaao jo ānī-jānī huī

maiñ dekhtā thā shafaq kī taraf magar titlī
paroñ pe rakh ke ajab rañg-zār le aa.ī

haath meñ kahrubā kī simran dekh
rañg āshiq kā aaj kaahī hai

tum bhī the sarshār maiñ bhī ġharq-e-bahr-e-rañg-o-bū
phir bhalā donoñ meñ āḳhir ḳhud-kashīda kaun thā

numāyāñ shoḳhī-e-rañg-e-tabī.at hotī jaatī hai
ki har kāfir adā se ab mohabbat hotī jaatī hai

mire dil ko na rakh be-rañg saaqī
ki har sāġhar gulābī ho rahā hai

hai yak do nafas sair-e-jahān-e-guzrāñ aur
ai shauq koī rañg-e-nashāt-e-dil-o-jāñ aur

milā bhī kyā use tauhīn-e-rañg-o-bū kar ke
gayā chaman se chaman ko jo be-numū kar ke

aisā rañg lagāo 'hasrat'
duniyā se begānī kar do

na rañg-o-naġhma na jām-o-mīnā na raqs-o-mastī
bagūle sab ko nigal rahe haiñ