Tags-Rang

ye ḳhushk be-rañg ḳhaar fāzil mire liye haiñ guloñ se behtar
mirī nazar meñ mirā bayābāñ kisī ke gulshan se kam nahīñ hai

aao chal kar ruḳh-e-nā-shusta ko dekheñ dam-e-sub.h
mauj-e-rañg-e-ufuq o nūr-e-sahar taaza kareñ

badlā nahīñ koī bhes nā-chārī se
har rañg hai iḳhtiyār sarkārī se

ne gul ko hai sabāt na ham ko hai e'tibār
kis baat par chaman havas-e-rañg-o-bū kareñ

ye kyā zarūr ho mizha-e-ishq ḳhūñ-fishāñ
kyuuñ dast-e-nāz ke liye rañg-e-hinā kī shart

shab ko numū-e-rang se ḳhanda-e-gul kā zikr thā
nashv-o-numā-e-husn se TukḌe huī qabā ki yuuñ

ḳhūn-e-shahīd-e-ishq vo kahte the faash kaise ho
rañg-e-gul-ezār se surḳh huī havā ki yuuñ

chāhte the shuhūd meñ ġhaib kā rañg dekhnā
merī zi-ḳhvesh-e-raftagī ban ga.ī rahnumā ki yuuñ

mahzūz ham bhī hoñge jo fursat kahīñ mile
gulshan bhī hai gulāb bhī rañg-e-bahār bhī

dekh husn-e-sharmagīñ dar-parda kyā laayā hai rañg
ishq rusvā-e-jahāñ badnām hī badnām thā

mahv the gulzār-e-rañgā-rañg ke naqsh-o-nigār
vahshateñ thī dil ke sannāTe the dasht-e-shām thā

sab ḳhad-o-ḳhāl mire dhund hue jaate haiñ
sub.h ke rañg se aao mujhe tasvīr karo

hai 'farīdī' ajab rañg-e-bazm-e-jahāñ miT rahā hai yahāñ farq-e-sūd-o-ziyāñ
nuur kī bhiik tāroñ se lene lagā āftāb apnī ik ik kiran bech kar

rut badaltī rahī rañg uḌte rahe kam-nazar bāġhbāñ kam-nazar hī rahe
ik ḳhayābāñ ko sairāb karte rahe ābrū-e-bahār-e-chaman bech kar

jab ek gul-ezār kī sohbat meñ aa gayā
aariz kā rañg merī tabī.at meñ aa gayā

tire ḳhat kā zamurrad-rañg dekhe
bahār-e-sumbulistāñ yaad aave

vo mere dil ke gulshan meñ agar aa jaa.e ai 'jauhar'
to har ik nā-shagufta ġhuncha rañg-o-nūr ho jaa.e

shahad sā ghul gayā talḳhāba-e-tanhā.ī meñ
rañg sā phail gayā dil ke siyah-ḳhāne meñ

ḳhvāb ḳhushbū-e-talab rañg-e-havas nāz-e-vafā
saarā sarmāya gayā chaliye yahāñ se chaliye

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ