Tags-Rang

kuchh rūp-nagar kā zikr karo kuchh rañg-mahal kī baat karo
rañgīn fazā hai mahfil kī rañgīn ġhazal kī baat karo

ajiib rañg-e-vafā hai ajiib tarz-e-sitam
na dil-pazīr mohabbat na shāndār fareb

'mohsin' achchhā hī huā us ne ulaT dī jo naqāb
rañg us kā jo numāyāñ na huā thā so huā

badal ga.ī na agar bāġhbāñ kī niyyat hī
chaman kā rañg badalne meñ der hī kyā hai

so manzar-e-ḳhūñ-rañg the koñpal se kalī tak
phūTī nahīñ yūñhī gul-e-sad-chāk se ḳhushbū

rañg dhul jaa.eñ ġhubār-e-ġham-e-hastī ke 'asar'
ab ke manzar koī dekhūñ to anokhā dekhūñ

jaise ḳhalā ke pas-manzar meñ rañg rañg ke naqsh-o-nigār
bāteñ us kī vazn se ḳhālī lahja bhārī-bharkam hai

uude uude sahāb se āñchal
rañg kī jāliyoñ ne maar diyā

mirī nazar meñ ye jīvan hai jal-parī jaisā
maiñ shoḳh rañg ke sāgar dikhāne vaalā huuñ

kitne nāzuk kitne ḳhush-gul phūloñ se ḳhush-rañg pyāle
ik badmast sharābī ne maiḳhāne meñ TukḌe kar Daale

ye aur baat ki rañg-e-bahār kam hogā
na.ī rutoñ meñ daraḳhtoñ kā baar kam hogā

ashk-e-gul rañg pirotī hai mizha meñ kyā ḳhuub
kyā banātī hai ye phūloñ kī chhaḌī merī aañkh

mayurka ke sāhiloñ pe kis qadar gulāb the
ki ḳhushbueñ thī be-tarah ki rañg be-hisāb the

hai ḳhuub magar phir bhī vo paikar-e-rañg-o-bū
kuchh aur nikhar jaa.e kuchh aur sañvar jaa.e

is dil pe guzartī hai kaifiyat-e-rañgā-rañg
tūfāñ sā umaD aa.e dariyā sā utar jaa.e

'bismil' harīm-e-husn meñ haiñ kām-yāb-e-shauq
josh-e-shabāb o rañg-e-ruḳh-e-ātishīñ se ham

ta.ajjub meñ huuñ dekh kar rañg-e-ālam
ilāhī ye kyā aa gayā hai zamānā

rañg lā.egī mirī āh-e-rasā mere ba.ad
tum mujhe yaad karoge ba-ḳhudā mere ba.ad

apnī nazroñ ko ḳharāb-e-justujū kartā rahā
jo musalsal imityāz-e-rañg-o-bū kartā rahā

jo bahāroñ kī chaman meñ aarzū kartā rahā
nazr-e-rañg-o-bū ḳhud apnā hī lahū kartā rahā