Tags-Rang

mire hī dam se shu.ūr-e-hastī
faqat maiñ rañg-e-jahāñ nahīñ huuñ

kuchh bhī kahte haiñ kahīñ shah ke musāhib 'jālib'
rañg rakhnā yahī apnā isī sūrat likhnā

do din ke liye ham aa.e haiñ ik shab kī javānī laa.e haiñ
firdaus-e-sarā-e-hastī meñ ham rañg-e-gul-e-mahtāb haiñ ham

'mīr' kā rañg baratnā nahīñ āsāñ ai 'dāġh'
apne dīvāñ se milā dekhiye dīvāñ un kā

kyā ilaaj us kā agar ho mudda.ā un kā yahī
ehtimām rañg-o-bū gulshan meñ karnā hī nahīñ

kisī tarah nahīñ jaatī fasurdagī dil kī
to zard rañg kā ik āsmāñ banāte haiñ

unheñ bhī dekh kabhī ai nigār-e-shām-e-bahār
jo ek rañg se tasvīr-e-jāñ banāte haiñ

har ghaḌī svāñg rachāyā ham ne
us ne sau rañg dikhā.e apne

vo jo badlā to zamāna badlā
rañg duniyā ne dikhā.e apne

tujhe chāhā to rañg ye miT ke jame tire baaġh meñ ḳhaak se paak hue
mare tere chaman kī havas meñ jo ham to ġhubār ko abr-e-bahār kiyā

tire shauq ne ham ko jo ḳhaak kiyā tire zauq ne ḳhaak se paak kiyā
tire rañg ne mujh pe kiyā ye karam mujhe tere chaman kā ġhubār kiyā

bā.is-e-imbisāt ho āmad-e-nau-bahār kyā
rañg-e-chaman dikhā.egā sīna-e-dāġh-dār kyā

phir junūñ fasl-e-gul meñ laayā rañg
phir maiñ hone ko sharmsār uThā

shikasta-hāl paḌā thā maiñ apne bistar par
khule hue sabhī rañg-e-farāġh the us din

zindagī meñ ab vo rañg-o-bū na DhūñDh
gul-adā gul-pairahan gul-rū na DhūñDh

fareb khaa.e haiñ rañg-o-bū ke sarāb ko pūjtā rahā huuñ
magar natā.ej kī raushnī meñ ḳhud apnī manzil pe aa rahā huuñ

ye holī iid kahtī hai bhalā kab apne hāthoñ meñ
vafā kā rañg hogā pyaar kī pichkāriyāñ hoñgī

aaj tak bhī na samajh paayā maiñ āñkhoñ meñ tirī
makr-e-rañgīñ thā ki phir rañg-e-vafā thā kyā thā

rañg pairāhan kā ḳhushbū zulf lahrāne kā naam
mausam-e-gul hai tumhāre baam par aane kā naam