Tags-Rang

maiñ jab bhī phuul us kī yaad ke gulshan se chuntī huuñ
to 'bīnā' karb merā rañg kā paikar badaltā hai

kyuuñ shikasta hai tirā rañg matā-e-sad-rañg
aur phir apne hī ḳhūnīñ-jigroñ ke hote

jī bahaltā hī nahīñ ḳhālī qafas se
rañg jaise uḌ ga.e hoñ canvas se

āñkhoñ se dukhoñ ke rañg āḳhir
sāras kī uḌaan uḌ ga.e haiñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jahāñ pe chhāyā sahāb-e-mastī baras rahī hai sharāb-e-mastī
ġhazab hai rañg-e-shabāb-e-mastī ki rind o zāhid bahak rahe haiñ

jamā ye rañg ki ab vaqt-e-zamzama-sanjī
chaman meñ mujh ko anādil pukār lete haiñ

zaḳhmoñ meñ ḳhud chamak hai aur us pe ye sitam hai
rañg-e-parīdañ se maiñ rahtā huuñ chāñdnī meñ

ab arsa-e-hastī meñ sad-rañg manāzir haiñ
is ā.ina-e-dil meñ ik aks utarne se

ho ga.ī mere gunāhoñ kī siyāhī maqbūl
sañg-e-asvad pe chaḌhā rañg jabīñ-sā.ī kā

le uḌā rañg falak jalva-e-ra.anā.ī kā
aks hai qaus-e-quzah meñ tirī añgḌā.ī kā

garche piro.e sher meñ jazbāt-e-rañg-o-bū
lekin bayāñ na ho sakīñ gahrā.iyāñ tamām

bahar-rañg o har shai o har jā o har sū
tujhī ko maiñ jalva-kunāñ dekhtā huuñ

manzar bhī muḳhtalif haiñ judā is ke rañg bhī
jis tarha koī ḳhvāb-e-navā hai ḳhalāoñ meñ

ye kaun mujh meñ hare mausamoñ utartā hai
ye kaise rañg haiñ ḳhushbū ye kis dayār kī hai

'īraj' sadā-e-rañg mahakne lagī havā
qaus-e-quzah ne khol diye par ghaTāoñ ke

banā ke apnī hī tasvīr ḳhud pashemāñ huuñ
jo rañg maiñ ne bhare sabz laal chīḳh uThe

nazzāra-e-nigāh kā unvāñ badal gayā
vo kyā ga.e ki rañg-e-gulistāñ badal gayā