Tags-Rang

fazā sunahrī thī rañg phailā thā chaar jānib
ki chāñd se vo zamīñ pe jaise utar rahā thā

vo dekh chāñd kī pur-nūr kahkashāoñ meñ
tamām rañg hai ḳhurshīd ke pasīne kā

halāl us ne kiyā ḳhūn-e-musalmāñ vaa.e bedardī
tirā dast-e-hinā.ī kāfir ab ye rañg laayā hai

kartā thā muravvat meñ kabhī mashq-e-sitam bhī
kahtā thā mire ḳhuuñ ko kabhī rañg-e-hinā vo

āñkheñ bujhī bujhī haiñ to manzar miTe miTe
ai zindagī kahāñ se tujhe āb-o-rañg duuñ

mire dil ke dekho to valvale ki har ek rañg meñ jā milī
jo ghaTe to un kā dahan bane jo baḌhe to arz-o-samā hue

dekh laala kā rañg us kī kafak
aaj haihāt mujh ko yaad aa.ī

na ho pahlū meñ apne jab vo sabza rañg hī zālim
to phir kis rañg kāTeñ ye balā se raat kaalī ham

bhiiḌ lagī thī rañg-birañge nāmoñ kī
phir merī be-rañgī kā elaan huā

kyā rañg the lahrā.e the jo rāh-ravī meñ
kyā nuur thā jo sham-e-hidāyat meñ nahīñ thā

kuchh sā.atoñ kā rañg mire saath saath hai
vo nik.hat-e-bahār magar ajnabī bhī hai

ye barg-o-bār kahāñ jāzib-nazar Thahre
tumhāre ba.ad to phūloñ se rañg-o-bū bhī ga.ī

afsos un par falak ne paayā qaabū
mutlaq nahīñ un meñ rañg DhūñDo yā bū

merī rāteñ bhī siyah din bhī añdhere mere
rañg ye mere muqaddar meñ kahāñ se aayā

dasht o makāñ ke fāsle be-rañg-o-nūr the
ik rañg le ke gardish-e-ayyām aa ga.ī

hue haiñ rañg-o-bū dast-o-garebāñ aise gulshan meñ
nasīm-e-sub.h kā dāman bhī ho kar taar taar aayā

tarab kā rañg ruḳh-e-gul pe āshkār aayā
kalī sī khil ga.ī jūñhī vo gul-ezār aayā

rañg darkār the ham ko tirī ḳhāmoshī ke
ek āvāz kī tasvīr banānī thī hameñ