Tags-Rang

be-ḳhvāb darīchoñ meñ kisī rañg-mahal ke
fānūs jalā.e haiñ umīdoñ ne ġhazal ke

sab karishma hai faqat rañg-e-duī kā varna
mazhab-e-pīr-e-muġhāñ mushrib-e-rindāñ hotā

dūsrī samt haiñ ḳhushbū ke ufuq kī sub.heñ
rañg ke kohar kī dīvār girā de koī

ḳhushbueñ kis kī haiñ ye rañg bhare haiñ kis ne
mere in ḳhaak ke zarrāt se pahle kyā thā

bād-e-bahārī itnā batā de sāda-dilān-e-mausam ko
sarf-e-chaman jo ḳhuun huā hai rañg vo kab tak lā.egā

sar pe sūraj hai to phir chhāñv se mahzūz na ho
dhuup kā rañg bhī dīvār meñ aa saktā hai

na jaane kitne na.e rañg mujh meñ ugte haiñ
vo ek lams banā detā hai bahār mujhe

ye rañg-e-bahār-e-ālam hai kyuuñ fikr hai tujh ko ai saaqī
mahfil to tirī suunī na huī kuchh uTh bhī ga.e kuchh aa bhī ga.e

sun to ḳhirām-e-vaqt meñ haiñ kaisī āhaTeñ
kyā rañg pur-fishāñ haiñ ġhubār-e-havā meñ dekh

haiñ sau tarah ke rañg har ik naqsh-e-pā meñ dekh
insāñ kā husn ā.ina-e-irtiqā meñ dekh

bahut daur-e-falak ne rañg badle
na ḳhū badlī magar us bad-gumāñ kī

kashish-e-rañg-e-mohabbat se vo aayā hai yahāñ
ai ḳhudā ab mire ghar se na kabhī jaa.e bahār

chāñdnī chhoḌ ga.ī thī ḳhushbū
dhuup ne rañg bharā phūloñ meñ

dil ne be-rañg hone se pahle
halke gahre ka.ī rachāv liye

jis rañg se hai dil meñ mire ishq ruḳh-e-yār
nāseh na ho dīvāna parī-ḳhāne ko mat chheḌ

thā qafas meñ bhī to thā favvāra-e-āhañg-o-rañg
is parinde ko to jannat-āshiyāñ honā hī thā

ma.āl-e-kār se gulshan kī har pattī laraztī hai
ki āḳhir rañg-o-bū uḌ jā.eñge ik din havā ho kar

chāhat-bhar ummīd rakhī hai aur rastoñ-bhar pā-mardī
durveshoñ ke chāl-chalan meñ rañg hai sab sultānoñ kā

vahī junūñ kī soḳhta-jānī vahī fusūñ afsānoñ kā
uḌā uḌā sā bujhā bujhā sā rañg vahī dīvānoñ kā

kabhī ishq karo aur phir dekho is aag meñ jalte rahne se
kabhī dil par aañch nahīñ aatī kabhī rañg ḳharāb nahīñ hotā