Tags-Rang

hai 'farīdī' ajab rañg-e-bazm-e-jahāñ miT rahā hai yahāñ farq-e-sūd-o-ziyāñ
nuur kī bhiik tāroñ se lene lagā āftāb apnī ik ik kiran bech kar

ze-farq-tā-ba-qadam rūp-rañg kī jhankār
tamām mehr-o-mohabbat tamām bos-o-kanār

ga.e mausamoñ kī vo sabz rañg hikāyateñ
koī āb-e-surḳh se likh gayā hai nigāh meñ

ruḳh havāoñ ke kisī samt hoñ manzar haiñ vahī
Topiyāñ rañg badaltī haiñ magar sar haiñ vahī

mere lahū kī sarshārī kyā us kī fazā bhī kitnī der
tere kaf-e-nāzuk pe rahegā rañg-e-hinā bhī kitnī der

har rañg meñ iblīs sazā detā hai
insān ko bahr-taur daġhā detā hai

shikast-e-dil tak na baat pahuñchī magar 'adā' kah sako to kahnā
ki ab ke sāvan dhanak se āñchal ke rañg saare utar ga.e haiñ

dost tasvīr to parā.ī thī
maiñ to bas rañg bharne vaalā thā

mere ham-rañg pairahan pahne
shaam aisī shikasta-hāl kahāñ

be-rañg-o-bū hai dāman-e-ahl-e-chaman abhī
qatre lahū ke sarf-e-bahārāñ hue to kyā

rañg havā se yuuñ Tapke hai jaise sharāb chuvāte haiñ
aage ho mai-ḳhāne ke niklo ahd-e-bāda-gusārāñ hai

kise ḳhabar thī ki mahshar kā hogā ye bhī rañg
zamīñ kā honā magar āsmāñ nahīñ honā

andhere meñ bhī mujhe jagmagā gayā hai koī
bas ik nigāh se rañg-e-badan badalne lagā

havā mahak uThī rañg-e-chaman badalne lagā
vo mere sāmne jab pairahan badalne lagā

kis rañg se gulshan meñ vo jān-e-bahār aayā
āñchal kī havā aa.ī zulfoñ kī ghaTā chhā.ī

hazāroñ rañg the ik aarzū ke
magar mujh ko to us ne ḳhud chunā thā

ruḳh se uḌtā huā vo rañg-e-bahār
ek tasvīr purānī meñ rahā

kis kī holī jashn-e-nau-rozī hai aaj
surḳh mai se sāqiyā dastār rañg

ziist hai is sahar-o-shām se bezār o zubūñ
lāla-o-gul kī tarah rañg-e-qabā do ham ko

butān-e-rañg-rañg se bhare the but-kade magar
terī adā-e-sādgī mirī nazar ko bhā ga.ī