Tags-Rang

ātish-e-rañg-e-hinā-o-zulf-e-pechāñ dekhiye
aag talvoñ meñ lagī niklā dhuāñ bālā-e-sar

rañg-e-mahfil meñ nazar aatā hai ik rañg-e-digar
terī mahfil ke sivā bhī kuchh tirī mahfil meñ hai

sardī khāte daañt bajāte aa.e december baabā
rañg-birañge uunī kapḌe laa.e december baabā

ye jism tañg hai siine meñ bhī lahū kam hai
dil ab vo phuul hai jis meñ ki rañg-o-bū kam hai

kurra-e-bād pe sad-rañg manāzir tere
halqa-e-arz meñ yak-naqsh samundar terā

de jaate ho mujh ko kitne rañg na.e
jaise pahlī baar mile ho tum bhī naañ

phuul ban jā.eñgī sūraj kī dahaktī kirneñ
dasht meñ rañg-e-gulistāñ kī tarah vāpas aa

dekh sako to dekh lo aa kar merā kamāl-e-āḳhir bhī tum
shab ke rañg se miltī lau ko kaise sharāra kar rakkhā hai

jamāl-e-sub.h-e-sukūñ shām-e-iztirāb kā rañg
sukūt-e-zard bhī maiñ surḳhī-e-sadā bhī maiñ

ruḳhsār o chashm-o-lab gul o sahbā shafaq hinā
duniyā-e-rañg-o-bū meñ tijārat lahū kī thī

ye biktī huī khokhlī rañg-raliyāñ
sanā-ḳhvān-e-taqdīs-e-mashriq kahāñ haiñ

vo raushnī hai ki az-fard-tā-ba-fard tamām
kisī kī shakl na sūrat kisī kā rañg na ruup

zarā dhīmī ho to ḳhushbū bhī bhalī lagtī hai
aañkh ko rañg bhī saare nahīñ achchhe lagte

bahār par bhī ḳhizāñ hī kā rañg ġhālib hai
havā zamāne kī gulshan ko sāzgār nahīñ

kashish thī phuul sī is meñ to lā-muhāla mujhe
asīr-e-rañg giraftār-e-bū bhī honā thā

mirī kahānī raqam huī hai havā ke aurāq-e-muntashir par
maiñ ḳhaak ke rañg-e-ġhair-fānī ko apnī tasvīr kar rahā huuñ

jab sīm-bar ke ġham se huā rañg juuñ talā
tab sab ne jā aziiz kiyā misl-e-zar mujhe

sukūt-e-shām kā hissa tū mat banā mujh ko
maiñ rañg huuñ so kisī mauj meñ milā mujh ko

tere sab rañg hayūle ke ye be-jān nuqūsh
jaise marbūt ḳhayālāt ke tāne-bāne

dil pareshāñ ho gayā rañg-e-zavāl-e-husn se
aag dekhī thī dhuāñ pahle kabhī dekhā na thā