Tags-Rang

jis rañg se ho abr safed o siyāh o surḳh
is tarah kar rahe haiñ tumhāre bahār chashm

zindagī se ek din mausam ḳhafā ho jā.eñge
rañg-e-gul aur bū-e-gul donoñ havā ho jā.eñge

khulne hī nahīñ detā koī rañg-e-tamannā
har lamha kisī ḳhauf kā idrāk pe rahnā

har shaam sitam laatī hai ik sub.h-e-ġharībāñ
ai rañg-e-vafā chādar-e-sad-chāk pe rahnā

tujhe to ghere hī rahte haiñ rañg rañg ke log
tire huzūr mirā harf-e-sāda kyā kartā

dil kā jo rañg hai ye rañg 'adā'
pahle āñkhoñ meñ rachā thā shāyad

rāt-bhar log jalāte rahe holī ke alaav
sub.h ko mil ke chale rañg uḌāne ke liye

gunah savāb ke saare hī rañg hoñ us meñ
farishta chhoḌ ke mujh ko koī bashar de de

naqsh faanī hī rahā rañg-e-baqā chaḌh na sakā
umr bhar ālam-e-imkāñ ko sañvārā ham ne

kaash dhartī par girā ḳhuuñ rañg le aatā 'riyāz'
jīte-jī ham apnī fasloñ kī kaTā.ī dekhte

saaqī Tuk ek mausam-e-gul kī taraf bhī dekh
Tapkā paḌe hai rañg chaman meñ havā se aaj

phir ek roz mire paas aa kar us ne kahā
ye oḌhnī zarā qaus-e-quzah se rañg mirī

taḌap kalī kī hai ye ishrat-e-numū ke liye
ki iztirāb hai irfān rañg-o-bū ke liye

aur hī kuchh rañg hai siine ke dāġhoñ kā mire
is ravish ke haiñ kahāñ tere sipar par mis ke phuul

rañg-e-ḳhūb-o-zisht meñ kyuuñ farq samjhe hai 'nasīr'
ḳhaar bhī tū hai usī kā haiñ banā.e jis ke phuul

tumheñ rañg-e-mai shaiḳh marġhūb kyā hai gulābī ho yā za.afrānī kaho to
pilā.e koī sāqi-e-hūr-paikar musaffā kashīda purānī kaho to

hijr o visāl ke rañg the jitne tārīkī meñ Duub ga.e
tanhā.ī ke manzar meñ ab kaun sā kār-e-hayāt kareñ

jis ke ā.īne meñ lākhoñ rañg the jalva-fagan
ḳhvāb sā vo lamha-e-aish-e-farāvāñ ho gayā

miir ke rañg meñ likh ke ġhazleñ 'alīm'
dhīre dhīre na tum miir ban jā.iyo

ajab rañg-e-tilism-o-tarz-e-nau hai
diyā hai aag kā miTTī kī lau hai