Tags-Rang

hulūl kar chukī ḳhud meñ hazār naqsh o rañg
ye kā.enāt jo ḳhāka-numā abhī tak hai

maslahat koī to darpesh thī 'shārib' varna
us ne tasvīr par ye rañg ubhārā phir kyuuñ

ham ek baar muhayyā na kar sake tujh ko
hazār rañg tirī justujū meñ bharte haiñ

bosa māñgā na gayā hoñToñ kā ai rashk-e-parī
rañg missī kā mujhe surma-e-āvāz huā

apne lahū kā rañg milā hai bahār meñ
laala misāl-e-shola-e-raqsāñ hamīñ se hai

har-rañg meñ rahe hamīñ sar-chashma-e-hayāt
hai kā.enāt ham se to yazdāñ hamīñ se hai

dīvār par gaḌe hue TukḌe pe kāñch ke
ye kis hisār-e-rañg meñ mahsūr ham hue

kuchh yuuñ hī zard zard sī 'nāhīd' aaj thī
kuchh oḌhnī kā rañg bhī khiltā huā na thā

khule rakhe haiñ maiñ ne saare rañg-o-bū ke rāste
mire chaman kī ye phaban chaman chaman se aa.ī hai

badalte rañg zaḳhmoñ ke haiñ niile surḳh aur kaale
falak ko bhī ye gardish chār-sū karne se miltā hai

mere hañsne pe ḳhafā the mire rone pe hañse
vahī rañg-e-sitam ishva-girāñ hai ki jo thā

dil meñ dāġhoñ kā jab se hai ik gulistāñ chhin ga.ī haiñ bahāroñ se rañgīniyāñ
ab guloñ meñ vo pahlī sī nik.hat kahāñ aarzī raunaq-e-rañg-o-bū rah ga.ī

āñkheñ bhī dekhtī haiñ zamāne ke rañg-Dhañg
dil bhī samajh rahā hai zamāna badal gayā

dīda-e-vā ke damakte ḳhvābo mere saath chaloge kab tak
tum ki vafūr-e-rañg-o-navā ho maiñ ki shikast-e-dil kī sadā huuñ

jahān-e-rañg-o-bū uljhā huā hai un ke Doroñ meñ
lagī haiñ kākul-e-taqdīr suljhāne tirī āñkheñ

rañg ke pahre haiñ ruḳhsāroñ kī āb-o-tāb par
aur rañgoñ ko haiñ zulfoñ kī laTeñ jakḌe hue

dil lahū jab talak na ho 'aḳhgar'
rañg-e-husn-e-talab nahīñ aatā

ho na ho bhar rahā hai zaḳhm-e-jigar
rañg ashkoñ meñ ab nahīñ aatā

ik lahr ki bas ḳhaak uḌāne pe ba-zid thī
ik rañg ki palkoñ meñ sajāne ke liye thā