Tags-Rang

log tujh ko bevafā kahte haiñ in se kyā gila
rañg-e-duniyā dekh kar ḳhāmosh ho jaate haiñ ham

koī ḳhush-rañg dilāsa hai to likhte jaao
merī dīvār pe na.are kī jagah ḳhālī hai

chaman pe bas na chalā varna ye chaman vaale
havā.eñ bechte nīlām rañg-o-bū karte

merī tahrīroñ se ḳhā.if ho ke phir aġhyār ne
rañg koī aur afsānoñ meñ mere bhar diyā

vaqfa hai zindagī to faqat chand roz kā
phir shahr-e-rañg-o-bū kī taraf ik safar bhī hai

ḳhvāhāñ tire har rañg meñ ai yaar hamīñ the
yūsuf thā agar tū to ḳharīdār hamīñ the

tabāhiyoñ kā zamāna hai hoshiyār raho
ḳhabar ke rañg meñ zāhir huī hai be-ḳhabarī

jo chāhe bhare maiñ ne musavvir se kahā thā
kuchh rang-e-mohabbat mirī tasvīr meñ aave

jaaḌe kī is dhuup ne dekho kaisā jaadū pher diyā
behad sabz daraḳhtoñ kā bhī rañg sunahrā lagtā hai

gulshan-e-ālam meñ jab tashrīf laatī hai bahār
rañg-o-bū ke husn kyā kyā kuchh dikhātī hai bahār

rañg-e-ḳhizāñ bhī jis kā hai rashk-e-bahār-e-abr
vo kisht za.afarāñ kī hamāre vatan meñ hai

vaz.a-dārī kī shaan hai ye 'jalīl'
rañg badlā na umr bhar apnā

nahīñ pahlā sā ab rañg-e-bahārāñ
ki vīrānī gul-o-gulzār meñ hai

kaise phāñdegā baaġh kī dīvār
tū giraftār-e-rañg-o-bū hai abhī

mirī shā.erī meñ na raqs-e-jām na mai kī rañg-fishāniyāñ
vahī dukh-bharoñ kī hikāyateñ vahī dil-jaloñ kī kahāniyāñ

kahtā to huuñ tujhe maiñ gul-e-ḳhush-numā magar
ḳhush rañg mausamoñ kā labāda nahīñ kahā

zarā sī jaan ko lākhoñ tarah ke khaTke haiñ
chaman na laa.e kahīñ rañg āsmāñ kī tarah

bichhaḌ ga.ī hai vo ḳhushbū ujaḌ gayā hai vo rañg
bas ab to ḳhvāb sā kuchh apnī chashm-e-tar meñ huuñ

rañg aur ruup ke pardīp meñ khone de mujhe
ḳhud ko chāhat kī chaḌhī rau meñ Dubone de mujhe

restaurant kī rañgā-rañg raushniyoñ meñ
Duubā samar ke ḳhūb-sūrat giit kī maddham lai meñ