Tags-Rang

kaash sab rañg ke huuñ aaj mire sab ash.ār
rañg har lafz meñ bhar jaao ġhazal hone tak

zuhhād kā ġhaflat se hai aurād-o-sujūd
hai iid kī tasvīr meñ rañg-e-ma.abūd

sad-ātisha agar ho tirā rañg-rūp hai
jo rañg phuul meñ hai nasha hai sharāb meñ

na hai 'shā.ir' ab ġham-e-nau-ba-nau na vo dāġh-e-dil na vo tāzgī
jinheñ e'timād-e-bahār thā vahī phuul rañg badal ga.e

phir se āñkhoñ meñ koī rañg sajā luuñ 'naināñ'
kab se ḳhvāboñ ko yahāñ bhuul ga.ī thī bonā

dil mirā ḳhaak shagufta ho chaman meñ jā kar
gul meñ ye rañg kahāñ ek tirī bū sī hai

rañg saare dho gayā hai raat kā bādal 'nasīm'
aur ghar nañge hue paanī barastā oḌh kar

nā ye laal jaTā.eñ rākheñ nā ye añg bhabūt ramā.eñ
nā ye gerū-rañg faqīrī-cholā pahan pahan itrā.eñ

shaam hī se baras rahī hai raat
rañg apne sambhāl kar rakhnā

kuchh rañg-e-shafaq tez thā kuchh aañkh meñ ḳhuuñ thā
kuchh zehn pe chhā.ī tire hāthoñ kī hinā thī

kuchh rañg the kuchh dhuup thī kuchh dahshat-e-anjām
kuchh saañs the kuchh saañs meñ ḳhushbū-e-fanā thī

bād-e-fanā bhī hai maraz-e-ishq kā asar
dekho ki rañg zard hai mere ġhubār kā

kisī ke rañg meñ Dhalnā hī hai agar 'dānish'
to apne aap ko thoḌā bahut ḳharāb karo

us kī āñkheñ bol rahī haiñ
sab ḳhush-rañg shabīheñ jhūTī

lamhe ye be-rañg patañge kab aate haiñ haath
saarā saarā din phirtā hai sūraj jaal liye

baġhaur dekhnā chehroñ kā rañg utarte hue
mire hunar kī chamak aa.ine meñ rakh denā

ek to missī kā naqsha jam rahā hai shaam se
paan kī laalī ne rañg apnā jamāyā ek aur

dikhā ke dast-e-hinā.ī na ḳhuuñ bahā dil kā
ki aur rañg se lūñgā maiñ ḳhūñ-bahā dil kā

qurb kī qaus-e-quzah kamre meñ bikhrī thī magar
raat bhar rañg-e-tamannā phir bhī nikhrā kyuuñ nahīñ

shahīd-e-ishq ke jalve kī intihā hī nahīñ
hazār rañg se aalam meñ rū-numā huuñ maiñ