Tags-Rang

badalte mausam ke rañg saare na tum hamāre
na ab ye sūraj na chāñd haala suno ġhazāla

numū ke faiz se rañg-e-chaman nikhar sā gayā
magar bahār meñ dil shorishoñ se Dar sā gayā

qalam se rābta-e-rang-o-āb TuuT gayā
kisī musavvir-e-fitrat kā ḳhvāb TuuT gayā

har aarzū meñ rañg hai bāġh-o-bahār kā
kāñTā bhī ek phuul hai us ḳhār-zār kā

dhanak jalī thī fazā ḳhuun se munavvar thī
mire mizāj kā ik rañg āsmān meñ thā

yaksāñ hai husn-o-ishq kī sar-mastiyoñ kā rañg
un kī ḳhabar unheñ hai na merī ḳhabar mujhe

phir se tirī āñkhoñ meñ sivā rang-e-mohabbat
phir tark-e-mohabbat kā irāda to nahīñ hai

udāsī ke jazīre par ġhamoñ ke saa.e gahre haiñ
nigāhoñ ke samundar meñ lahū-rañg ashk Thahre haiñ

na khil ke ser huā maiñ na jal ke raakh huā
ki merī pyaas bhī hai tere rañg-e-lab kī tarah

vahī māyūsī kā aalam vahī naumīdī kā rañg
zindagī bhī kisī muflis kī duā ho jaise

hamārī un kī siyāsat kā rañg ḳhuub hai vaah
ki ham imaam to vo sarbarāh rakhte haiñ

khiltā hai mausamoñ ke taġhayyur kā mujh se rañg
āḳhir mire ḳhamīr kī miTTī kahāñ se aa.ī

aah ne to ḳhema-e-gardūñ ko phūñkā dekheñ ab
rañg laate haiñ hamāre dīda-e-ḳhūñ-bār kyā

musalsal paḌī hai kaḌī dhuup mujh par
mirā rañg dekho maiñ kaisā huā huuñ

vo guloñ meñ guloñ kī sī bū na rahī vo azīzoñ meñ lutf kī ḳhū na rahī
vo hasīnoñ meñ rañg-e-vafā na rahā kaheñ aur kī kyā vo hamīñ na rahe

gyaan luTāne niklā thā aur jholī meñ bhar laayā pyaar
maiñ aisā rañg-rez huuñ jis pe rañg chunar kā chaḌh baiThā

hameñ laakh zamāna lubhā.e to kyā na.e rañg jo charḳh dikhā.e to kyā
ye muhāl hai ahl-e-vafā ke liye ġham-e-millat o ulfat-e-dīñ na rahe

yuuñ na dekho āriz-e-gul-rañg ko
aa.ine meñ paḌ rahī haiñ jhā.iyāñ

raushnī phailī to sab kā rañg kaalā ho gayā
kuchh diye aise jale har-sū añdherā ho gayā